ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
Ո Ր Ո Շ ՈՒ Մ
5 նոյեմբերի 2026 թվականի N 1617-Ն
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2023 ԹՎԱԿԱՆԻ ՍԵՊՏԵՄԲԵՐԻ 22-Ի N 1615-Ն ԵՎ 2015 ԹՎԱԿԱՆԻ ՄԱՐՏԻ 19-Ի N 596-Ն ՈՐՈՇՈՒՄՆԵՐՈՒՄ ԼՐԱՑՈՒՄՆԵՐ ԵՎ ՓՈՓՈԽՈՒԹՅՈՒՆ ԿԱՏԱՐԵԼՈՒ ՄԱՍԻՆ
Հիմք ընդունելով «Քաղաքաշինության մասին» օրենքի 10-րդ հոդվածի 1-ին մասի 11-րդ, 12-րդ և 22-րդ կետերը և «Նորմատիվ իրավական ակտերի մասին» օրենքի 33-րդ և 34-րդ հոդվածները՝ Հայաստանի Հանրապետության կառավարությունը որոշում է.
1. Հայաստանի Հանրապետության կառավարության 2023 թվականի սեպտեմբերի 22-ի «Քաղաքաշինության բնագավառում լիցենզիա չպահանջող աշխատանքների և ծառայությունների ցանկը հաստատելու մասին» N 1615-Ն որոշման հավելվածի 3-րդ գլուխը լրացնել հետևյալ բովանդակությամբ 12.1-ին կետով՝
«12.1. Հայաստանի Հանրապետության հարկային օրենսգրքի 22-րդ հոդվածի իմաստով ոչ ռեզիդենտ կազմակերպություն հանդիսացող գլխավոր կապալառուի կողմից շինարարական օբյեկտների կառուցման կամ վերակառուցման աշխատանք ների ընդհանուր պլանավորումը, կազմակերպումը և համակարգումը՝ առանց լիցենզավորման ենթակա շինարարական աշխատանքներն անձամբ կատարելու, եթե տվյալ կազմակերպությունը չունի «Լիցենզավորման մասին» օրենքի 7-րդ հոդվածի 6.1-ին կամ 6.2-րդ մասով նախատեսված՝ համապատասխան գործունեության իրականացման իրավունք տրամադրելու համար հիմք հանդիսացող օտարերկրյա լիցենզիա կամ համապատասխան գործունեության տեսակով զբաղվելու իրավունքը հավաստող փաստաթուղթ։
Լիցենզավորման ենթակա շինարարական աշխատանքները կատարվում են տվյալ աշխատանքների ենթատեսակին և օբյեկտի ռիսկայնության աստիճանին համապատասխան դասի գործող լիցենզիա և համապատասխան ենթատեսակի գործող ներդիր ունեցող ենթակապալառուների միջոցով։ Օրենքով կամ Հայաստանի Հանրապետության միջազգային պայմանագրով այլ հիմքով գործունեության իրավունք ունեցող անձինք աշխատանքները կատարում են այդ իրավունքի սահմաններում։ Համապատասխան իրավունքը պետք է պահպանվի տվյալ աշխատանքների կատարման ամբողջ ընթացքում։
Գլխավոր կապալառուն կազմակերպում և համակարգում է աշխատանքների հաջորդականությունը, փոխկապակցվածությունը և կատարման ժամանակացույցը՝ առանց փոխարինելու աշխատանքներն անմիջականորեն կատարող ենթակապալառուներին, բացառությամբ սույն կետի հինգերորդ պարբերությամբ նախատեսված դեպքի՝ այդ պարբերությամբ նախատեսված իրավունքի շրջանակներում։
Սույն կետով նախատեսված ծառայությունների համար լիցենզիա չպահանջելը չի ազատում գլխավոր կապալառուին, ենթակապալառուներին և շինարարության մյուս մասնակիցներին օրենսդրությամբ և պայմանագրերով իրենց վերապահված պարտականություններից ու պատասխանատվությունից։
Սույն կետը չի սահմանափակում գլխավոր կապալառուի՝ լիցենզավորման ենթակա շինարարական աշխատանքներն անձամբ կատարելու իրավունքը՝ այդ աշխատանքները կատարելու համար սույն կետի երկրորդ պարբերությամբ նախատեսված իրավունքը ձեռք բերելու պահից և դրա սահմաններում։»։
2. Հայաստանի Հանրապետության կառավարության 2015 թվականի մարտի 19-ի «Հայաստանի Հանրապետությունում կառուցապատման նպատակով թույլտվությունների և այլ փաստաթղթերի տրամադրման կարգը հաստատելու և Հայաստանի Հանրապետության կառավարության մի շարք որոշումներ ուժը կորցրած ճանաչելու մասին» N 596-Ն որոշման մեջ կատարել հետևյալ լրացումները և փոփոխությունը.
1) N 1 հավելվածը լրացնել հետևյալ բովանդակությամբ 129.1-ին կետով՝
«129.1. Հայաստանի Հանրապետության կառավարության 2023 թվականի սեպտեմբերի 22-ի N 1615-Ն որոշման հավելվածի 12.1-ին կետով նախատեսված դեպքում N 5 հավելվածի ձևաթղթերում նշվում են գլխավոր կապալառուի անվանումը և նրա հետ կնքված պայմանագրի տվյալները։ Եթե գլխավոր կապալառուն անձամբ չի կատարում լիցենզավորման ենթակա շինարարական աշխատանքներ, նրա լիցենզիայի համարի համար նախատեսված դաշտում նշվում է «չի պահանջվում՝ Հայաստանի Հանրապետության կառավարության 2023 թվականի սեպտեմբերի 22-ի N 1615-Ն որոշման հավելվածի 12.1-ին կետ»։ N 5 հավելվածի N 2-5 ձևի տեղեկանքին կցվում է լիցենզավորման ենթակա շինարարական աշխատանքները կատարող անձանց ցանկը՝ յուրաքանչյուրի անվանմամբ, կատարելիք աշխատանքների տեսակներով, համապատասխան լիցենզիայի և ներդիրի տվյալներով, իսկ օրենքով կամ Հայաստանի Հանրապետության միջազգային պայմանագրով այլ հիմքով գործունեության իրավունք ունենալու դեպքում՝ այդ իրավունքը հավաստող փաստաթղթի տվյալներով։ Տեղեկանքին կցվում են նաև գլխավոր կապալառուի՝ օտարերկրյա պետությունում գրանցումը հավաստող փաստաթուղթը և սույն կետում նշված բացառության կիրառման համար պահանջվող՝ օտարերկրյա լիցենզիայի կամ համապատասխան գործունեության իրավունք հավաստող փաստաթղթի բացակայության վերաբերյալ կազմակերպության գրավոր հայտարարությունը՝ դրա իրավական կամ փաստական հիմքերը հաստատող տեղեկություններով։ Նշված տվյալների փոփոխությունների մասին ծանուցումն իրականացվում է սույն կարգի 133-րդ կետով սահմանված կարգով։».
2) N 1 հավելվածը լրացնել հետևյալ բովանդակությամբ 142.1-ին կետով՝
«142.1. Հայաստանի Հանրապետության կառավարության 2023 թվականի սեպտեմբերի 22-ի N 1615-Ն որոշման հավելվածի 12.1-ին կետով նախատեսված դեպքում գլխավոր կապալառուն ապահովում է սույն կարգի 142-րդ կետով նախատեսված կատարողական փաստաթղթերի ամբողջական փաթեթի կազմումը և փոխանցումը կառուցապատողին։ Աշխատանքներն անմիջականորեն կատարող անձինք և պատասխանատու մասնագետները կազմում ու ստորագրում են իրենց կատարած աշխատանքներին վերաբերող փաստաթղթերը՝ օրենսդրությամբ իրենց վերապահված իրավասության սահմաններում։ Պահպանվում են տեխնիկական և հեղինակային հսկողություն իրականացնող անձանց մասնակցությանը ներկայացվող պահանջները։ Սույն կարգի 144-րդ կետով նախատեսված՝ բացակայող կատարողական փաստաթղթերի վերականգնման պարտականությունը կրում է գլխավոր կապալառուն՝ առանց սահմանափակելու ենթակապալառուների նկատմամբ օրենքից կամ պայմանագրից բխող նրա պահանջները։».
3) N 1 հավելվածի 147-րդ կետը լրացնել հետևյալ բովանդակությամբ նոր պարբերությամբ՝
«Հայաստանի Հանրապետության կառավարության 2023 թվականի սեպտեմբերի 22-ի N 1615-Ն որոշման հավելվածի 12.1-ին կետով նախատեսված դեպքում ընդունող հանձնաժողովի կազմում շինարարական աշխատանքները կատարած կապալառուի մասնակցություն նախատեսված լինելու դեպքում ընդգրկվում են գլխավոր կապալառուն և շինարարական աշխատանքները կատարած ենթակապալառուները կամ նրանց ներկայացուցիչները։ Գլխավոր կապալառուի մասնակցությունը չի փոխարինում աշխատանքներն անմիջականորեն կատարած անձանց և մասնագիտական իրավասություն ունեցող անձանց մասնակցությանը։».
4) N 5 հավելվածում «3-րդ գլխով սահմանված դեպքերում» բառերը բոլոր դեպքերում փոխարինել «3-րդ գլխի 6-12-րդ կետերով սահմանված դեպքերում» բառերով։
3. Սույն որոշումն ուժի մեջ է մտնում պաշտոնական հրապարակմանը հաջորդող օրվանից։
|
Հայաստանի Հանրապետության |
Ն. Փաշինյան |
|
Երևան |
|
05.11.2026 ՀԱՎԱՍՏՎԱԾ Է ԷԼԵԿՏՐՈՆԱՅԻՆ ՍՏՈՐԱԳՐՈՒԹՅԱՄԲ |
Պաշտոնական հրապարակման օրը՝ 5 նոյեմբերի 2026 թվական:
| Փոփոխող ակտ | Համապատասխան ինկորպորացիան |
|---|
| Փոփոխող ակտ | Համապատասխան ինկորպորացիան |
|---|