ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՐԱՐԱՏԻ ՄԱՐԶԻ ԱՐԱՐԱՏ ՀԱՄԱՅՆՔԻ ԱՐԱՐԱՏ ՔԱՂԱՔԻ Ս․ ՇԱՀՈՒՄՅԱՆ ՓՈՂՈՑ 20 ԵՎ 37/1 ՀԱՍՑԵՆԵՐՈՒՄ ԿԱՌՈՒՑԱՊԱՏՄԱՆ ՆԵՐԴՐՈՒՄԱՅԻՆ ԾՐԱԳՐԻՆ ՀԱՎԱՆՈՒԹՅՈՒՆ ՏԱԼՈՒ, ԾՐԱԳՐԻ ԻՐԱԿԱՆԱՑՄԱՆ ՆՊԱՏԱԿՈՎ ԳՈՒՅՔ ՆՎԻՐԱԲԵՐԵԼՈՒ ՀԱՄԱՁԱՅՆՈՒԹՅՈՒՆ ՏԱԼՈՒ ՄԱՍԻՆ

Ղեկավարվելով «Հողային օրենսգրքի» 65-րդ հոդվածի 6-րդ մասով, «Կառավարության կառուցվածքի և գործունեության մասին» օրենքի 11-րդ հոդվածի 8-րդ մասով՝ Հայաստանի Հանրապետության կառավարությունը որոշում է.

1․ Հավանություն տալ «ՄԼ ՄԱՅՆԻՆԳ» սահմանափակ պատասխանատվությամբ ընկերության (այսուհետ` ընկերություն) կողմից ներկայացված՝ Հայաuտանի Հանրապետության Արարատի մարզի Արարատ համայնքի Արարատ քաղաքի Ս․ Շահումյան փողոց 20 և 37/1 հասցեներում կառուցապատման ներդրումային ծրագրին (այսուհետ ծրագիր)՝ համաձայն N 1 հավելվածի:

2․ Համաձայնություն տալ Հայաստանի Հանրապետության Արարատի մարզի Արարատ համայնքի սեփականությունը հանդիսացող՝ Արարատ քաղաքի Ս․ Շահումյան փողոց 20 հասցեում գտնվող, 4,808,414.16 դրամ շուկայականին մոտարկված կադաստրային արժեքով, 0.25608 հա հողամասը (առկա է քանդման ենթակա 1231.3 քառ. մ մակերեսով ինքնակամ անավարտ շինություն, կադաստրային ծածկագիր՝ 03-002-0016-0092) և Արարատ քաղաքի Ս․ Շահումյան փողոց 37/1 հասցեում գտնվող՝ 2,020,780.74 դրամ շուկայականին մոտարկված կադաստրային արժեքով, 0.10762 հա հողամասը (առկա է քանդման ենթակա 451.11 քառ. մ մակերեսով ինքնակամ անավարտ շինություն, կադաստրային ծածկագիր՝ 03-002-0015-0147, այսուհետ միասին` գույք) ընկերությանը անհատույց սեփականության իրավունքով՝ նվիրաբերությամբ, տրամադրելուն՝ սույն որոշման 1-ին կետով հավանության արժանացած ծրագրի իրականացման նպատակով։

3․ Սահմանել ծրագրի իրականացման նպատակով գույքի նվիրաբերության գործարքի հիմնական պայմանները՝ համաձայն N 2 հավելվածի։

4. Սահմանել, որ ծրագրի իրականացման մեկնարկ է համարվում սույն որոշման 5-րդ կետում նշված պայմանագրերի կնքման պահը:

5. Առաջարկել Հայաստանի Հանրապետության Արարատի մարզի Արարատ համայնքի ղեկավարին՝

1) Արարատ համայնքին սեփականության իրավունքով պատկանող՝ սույն որոշման 2-րդ կետով նախատեսված գույքը ծրագրի իրականացման նպատակով ընկերությանը տրամադրել նվիրաբերության կարգով և ընկերության հետ կնքել նվիրաբերության պայմանագիր.

2) նվիրաբերության պայմանագրում նախատեսել դրույթ, համաձայն որի՝ սույն որոշման 3-րդ կետով սահմանված 2-րդ հավելվածի պայմանները չկատարելու դեպքում սույն որոշմամբ նվիրաբերությամբ տրամադրված գույքը սեփականության իրավունքով և համայնքի կողմից առանց փոխհատուցման անցնում է համայնքին.

3) սույն որոշումն ընդունվելուց հետո մեկամսյա ժամկետում հաստատել ծրագրի իրականացման արդյունքում համայնքին փոխանցվելիք 48 (քառասունութ) բնակարանների շահառուների կամ նրանց իրավահաջորդների ցանկը` հիմք ընդունելով նախկինում նրանց հետ կնքված պայմանագրերը:

6․ Հայաստանի Հանրապետության Արարատի մարզպետին` սույն որոշման 2-րդ կետում նշված հողամասերը ծրագրի մեկնարկից հետո 5 (հինգ) տարվա ընթացքում նպատակային նշանակությամբ չօգտագործվելու և չկառուցապատվելու դեպքում սահմանված կարգով ներկայացնել սույն որոշումն ուժը կորցրած ճանաչելու վերաբերյալ Հայաստանի Հանրապետության կառավարության որոշման նախագիծ, իսկ Հայաստանի Հանրապետության Արարատի մարզի Արարատ համայնքի ղեկավարին առաջարկել լուծել ընկերության հետ կնքված նվիրաբերության պայմանագիրը:

29 հունիս 2026

65

ԱՐԱՐԱՏԻ ՄԱՐԶ, ՔԱՂԱՔ ԱՐԱՐԱՏ, Ս. ՇԱՀՈՒՄՅԱՆ 20 ԵՎ Ս. ՇԱՀՈՒՄՅԱՆ 37/1 ՀԱՍՑԵՆԵՐՈՒՄ «ՄԼ ՄԱՅՆԻՆԳ» ՍՊ ԸՆԿԵՐՈՒԹՅԱՆ ԿՈՂՄԻՑ ԱՌԱՋԱՐԿՎՈՂ ՆԵՐԴՐՈՒՄԱՅԻՆ ԾՐԱԳԻՐ

1. ՆԱԽԱԲԱՆ

Սույն ներդրումային ծրագրով (այսուհետ նաև՝ ծրագիր) նախատեսվում է իրականացնել սոցիալական բնակարանաշինարարական ծրագիր ՀՀ Արարատի մարզի Արարատ համայնքում: Մասնավորապես, ծրագրի շրջանակներում Արարատ, Արարատ, Ս. Շահումյան 20 և Ս. Շահումյան 37/1 հասցեներում կկառուցվեն բազմաբնակարան բնակելի շենքեր, ընդհանուր 198 բնակարան, որից կօգտվեն ինչպես նախկինում իրենց բնակարաններն ազատած, սակայն փոխհատուցում չստացած քաղաքացիները, այլև ցանկացած այլ անձ, ինչն էլ կնպաստի համայնքի զարգացմանը և համայնքում սոցիալական կայունության ամրապնդմանը: ՀՀ Արարատի մարզի Արարատ համայնքի նախնական հավանությամբ ծրագրի իրականացումը նախաձեռնում է «ՄԼ ՄԱՅՆԻՆԳ» ՍՊ ընկերությունը և միաժամանակ ստանձնում է դրա իրագործումը՝ կորպորատիվ սոցիալական բարձր պատասխանատվությամբ:

«ՄԼ ՄԱՅՆԻՆԳ» ՍՊ ընկերությունը Հայաստանի Հանրապետությունում հանքարդյունաբերության, շինարարության, շինանյութերի արտադրության ու կառուցապատման ոլորտի առաջատար ընկերություն է: «ՄԼ ՄԱՅՆԻՆԳ» ՍՊ ընկերությունը շահագործում է տասնյակ հանքավայրեր Արարատի, Արմավիրի, Արագածոտնի, Կոտայքի մարզերում և Երևանում։ Միաժամանակ «ՄԼ ՄԱՅՆԻՆԳ» ՍՊ ընկերությունը հանրապետությունում բետոն և բետոնե արտադրատեսակներ արտադրող ամենամեծ ընկերությունն է։

Իրականացնելով և իրականացրած լինելով ավելի քան 2 մլն քառակուսի մետր կառուցապատման մակերեսով շինարարություն՝ «ՄԼ ՄԱՅՆԻՆԳ» ՍՊ ընկերությունն ունի ավելի քան 17 քաղաքաշինական նախագիծ, որոնցից 10-ն արդեն հաջողությամբ ավարտվել և շահագործման է հանձնվել։

Հատկանշական է նաև քաղաքաշինության ոլորտում «ՄԼ ՄԱՅՆԻՆԳ» ՍՊ ընկերության կողմից պետության հետ ձևավորված հաջող գործակցության փորձառությունը։ Մասնավորապես՝ Հայաստանի Հանրապետության կառավարության երեք որոշումներով1 իրականացվել են հանրային ծառայողներին բնակարաններով ապահովման ծրագրեր, որոնցից առաջինն արդեն իսկ բարեհաջող ավարտված է, իսկ հաջորդ երկուսը՝ մեկնարկել և սահմանված ժամկետներում և կարգով իրագործվում են։ Ի լրումն դրան՝ Երևան քաղաքի Արզումանյան փողոցի 10 և 17 շենքերի ռենովացիայի ծրագրի շրջանակում ՀՀ կառավարության համապատասխան որոշմամբ2 հաստատվել է նաև «ՄԼ ՄԱՅՆԻՆԳ» ՍՊ ընկերության ներդրումային ծրագիրը։

Հատկանշական է, որ «ՄԼ ՄԱՅՆԻՆԳ» ՍՊ ընկերությունը կառուցապատման ծրագրեր ունի նաև մարզկենտրոններում, որոնցից մեկն արդեն հանձնված է շահագործման, իսկ հաջորդ երկուսն իրագործման փուլում են։

Ներդրումային ծրագրի արդիականությունն ու կարևորությունը առավել ամրապնդվում են ստորև ներկայացված նախադրյալներով․

• 48 բնակիչների առջև համայնքի կողմից ստանձնված բնակարանով ապահովման պարտավորության իրականացումը, որը լուրջ սոցիալական և իրավական տարր է պարունակում.

• ծրագրի շրջանակում համայնքային սեփականության գրադարանի կառուցումը, որը լուրջ ձեռքբերում կլինի համայնքի սոցիալ-մշակութային, կրթական կյանքում.

• Հայաստանի Հանրապետության վիճակագրական կոմիտեի կողմից հրապարակված տվյալները փաստում են, որ Արարատի մարզը վերջին տարիներին բնութագրվում է բնակելի շինարարության մեծ ծավալներով և աճի բարձր տեմպով։ Մասնավորապես, համաձայն «Հայաստանի Հանրապետության սոցիալ-տնտեսական վիճակը 2025 թվականի հունվար-դեկտեմբերին» զեկույցի3, Արարատի մարզում շահագործման հանձնված բնակելի շենքերի ընդհանուր մակերեսը մոտ 2 անգամ գերազանցել է նախորդ տարվա նույն ցուցանիշը։ Այս ակտիվությունը մեծապես պայմանավորված էր այն հանգամանքով, որ հիփոթեքային վարկի տոկոսագումարներից վճարված եկամտային հարկի վերադարձի արտոնությունն առաջիկա 1 տարվա ընթացքում կիրառելի է երևանամերձ մարզերում։ Սակայն շինարարության ծավալները էապես կվերանայվեն առաջիկայում՝ պայմանավորված վերը նշված արտոնության կիրառության ժամկետի սպառմամբ։ Ըստ այդմ՝ նոր քաղաքաշինական ծրագիրը լրացուցիչ խթան կդառնա մարզի քաղաքաշինության ոլորտի բարգավաճման համար.

• ծրագրի իրականացման հրատապությունն ու արդիականությունը պայմանավորված են նաև նույն եկամտային հարկի վերադարձի արտոնության կիրառության ժամկետային սահմանափակմամբ (մինչև 31/12/2026 թ․), քանզի հաշվի առնելով ծրագրի սոցիալական ուղղվածությունը՝ պոտենցիալ շահառուների ստվար զանգվածին նախագիծն առավել հասանելի կլինի հենց եկամտային հարկի վերադարձի արտոնության կիրառության պարագայում միայն։

Ընդհանուր առմամբ՝ ծրագրի բարեհաջող իրագործումը կարող է լավ և վարակիչ նախադեպ դառնալ նաև այլ համայնքների համար, որտեղ ևս վաղուց ծառացած նման կնճռոտ սոցիալական խնդիրներ կան։

__________________

1 ՀՀ Կառավարության 4 հունիսի 2020 թվականի 885-Ն որոշումը, 19 հոկտեմբերի 2023 թվականի N 1826-Ն որոշումը, 12 ապրիլի 2024 թվականի N 518-Ն որոշումը։

2 ՀՀ Կառավարության 13 ապրիլի 2023 թվականի N 530-Ն որոշումը։

3 «Հայաստանի Հանրապետության սոցիալ-տնտեսական վիճակը 2025 թվականի հունվար-դեկտեմբերին», էջ 27, Աղյուսակ «Շահագործման հանձնված բնակելի շենքերի ընդհանուր մակերեսը և դրանց ինդեքսները ՀՀ մարզերում և ք. Երևանում, 2025 թ. IV եռամսյակ»

2. ԾՐԱԳՐԻ ՆԿԱՐԱԳՐՈՒԹՅՈՒՆԸ

Ծրագրով նախատեսվում է Արարատի մարզ, Արարատ համայնքի Արարատ քաղաքի Շահումյան 20 և Շահումյան 37/1 հասցեներում «ՄԼ ՄԱՅՆԻՆԳ» ՍՊ ընկերության միջոցներով կառուցել տասական վերգետնյա հարկ ունեցող երկու բազմաբնակարան շենք: Կառուցապատման ծրագրերի համառոտ նկարագիրը ներկայացվում է ստորև․

Շահումյան 20

Հողատարածքի մակերեսը՝ 2,560.8 քառ. մ

Կառուցապատման մակերեսը՝ 1,274.8 քառ. մ

Կառուցապատման ընդհանուր մակերեսը՝ 14,100 քառ. մ

Կանաչապատման մակերեսը՝ 663.4 քառ. մ

Բնակարանների քանակը՝ 126 միավոր

Բնակարանների ներքին հարդարվածության վիճակը՝ ըստ նախագծի՝ ՀՀ կառավարության 2015 թվականի մարտի 19-ի N 596-Ն որոշմամբ հաստատված N 1 հավելվածի 173-րդ կետի պահանջի համաձայն

Ստորգետնյա ավտոկայանատեղերի քանակը՝ 25 միավոր

Շահումյան 37/1

Հողատարածքի մակերեսը՝ 1,076.2 քառ. մ

Կառուցապատման մակերեսը՝ 668.5 քառ. մ

Կառուցապատման ընդհանուր մակերեսը՝ 7,55 1 քառ.մ

Կանաչապատման մակերեսը՝ 117.7 քառ. մ

Բնակարանների քանակը՝ 72 միավոր

Բնակարանների ներքին հարդարվածության վիճակը՝ ըստ նախագծի՝ ՀՀ կառավարության 2015 թվականի մարտի 19-ի N 596-Ն որոշմամբ հաստատված N 1 հավելվածի 173-րդ կետի պահանջի համաձայն

Նշված հասցեներում նախկինում կառուցված շենքերի ապամոնտաժման ժամանակ բնակիչների և Քաղսովետի գործկոմի քարտուղարի միջև կնքվել են պայմանագրեր, որոնց համաձայն՝ բնակիչները բնակարաններն ազատել են՝ հետագայում նույն հասցեներում նոր շենք կառուցվելու պարագայում բնակարան ստանալու պայմանով։ Ըստ այդմ՝ ծրագրի իրագործման շրջանակում նախատեսվում է վերը նշված 48 բնակիչներին բնակարանով ապահովման նպատակով կառուցվող շենքերից մոտ 68 քառակուսի մետր մակերեսով 48 բնակարան անհատույց հիմունքներով, սեփականության իրավունքով հանձնել Արարատ խոշորացված համայնքին։ Մնացած 150 բնակարանները կմնան «ՄԼ ՄԱՅՆԻՆԳ» ՍՊ ընկերության սեփականության ներքո և կառաջարկվեն այլ անձանց՝ հատուցելի հիմունքներով:

Ի լրումն վերը նշվածի՝ նախատեսվում է նաև Շահումյան 37/1 հասցեում կառուցվող բազմաբնակարան բնակելի շենքի 2-րդ հարկում նախատեսել մոտ 686 քառակուսի մետր մակերեսով հասարակական տարածք՝ հետագայում գրադարան դարձնելու նպատակով, որը ևս անհատույց հիմունքներով կհանձնվի Արարատ խոշորացված համայնքին։

Հաշվի առնելով վերը նշված ներդրումային ծրագրի ընդգծված սոցիալական բնույթը՝ ակնկալվում է Արարատի մարզ, Արարատ համայնքի Արարատ քաղաքի Շահումյան 20 և Շահումյան 37/1 հասցեների համայնքային սեփականություն հանդիսացող հողամասերի՝ «ՄԼ ՄԱՅՆԻՆԳ» ՍՊ ընկերության սեփականության իրավունքով անհատույց տրամադրման հնարավորության դիտարկումը։

3. ԱԿՆԿԱԼՎՈՂ ԱՐԴՅՈՒՆՔՆԵՐԸ

Ծրագրի իրականացմամբ ակնկալվող արդյունքներն են`

 կկառուցվի ընդհանուր 198 բնակարան, որից մոտ 68 քառակուսի մետր մակերեսով 48 բնակարան անհատույց հիմունքներով, սեփականության իրավունքով կհանձնվի Արարատ խոշորացված համայնքին՝ ի կատարումն Քաղսովետի գործկոմի և բնակիչների միջև նախկինում կնքված պայմանագրային պարտավորությունների, իսկ մնացած 150 բնակարանը «ՄԼ ՄԱՅՆԻՆԳ» ՍՊ ընկերությունը հատուցելի հիմունքներով կառաջարկի այլ անձանց.

 համայնքը կհամալրվի մոտ 686 քառակուսի մետր մակերեսով նոր գրադարանով, որը ևս անհատույց հիմունքներով կհանձնվի Արարատ խոշորացված համայնքին.

 համայնքում կակտիվանա շինարարության-կառուցապատման ոլորտը.

 կամրապնդվի «ՄԼ ՄԱՅՆԻՆԳ» ՍՊ ընկերության հանդեպ համայնքային վստահությունը.

 շինարարության 36 ամսվա ընթացքում կձևավորվի մոտ 50 մշտական աշխատատեղ մոտ 400,000 ՀՀ դրամ միջին աշխատավարձով, որոնք առավելագույն ջանքերի սկզբունքով կհամալրվեն համայնքի բնակիչներից.

 շինարարության ավարտից հետո համայնքային բյուջեում կարձանագրվի եկամուտների աճ՝ ի հաշիվ հավելյալ անշարժ գույքի հարկի.

 շինարարության ընթացքում և դրանից հետո պետական բյուջեում կարձանագրվի հարկային եկամուտների աճ՝ ի հաշիվ շինարարության ընթացքում և դրանից հետո գույքերի սեփականության իրավունքով հանձնումից գոյացող լրացուցիչ հարկային եկամուտների։ Վերոնշյալի համատեքստում նախատեսվում է մոտ 1 մլրդ դրամի չափով լրացուցիչ հարկային եկամուտ.

 ծրագրի շրջանակում նախատեսվում է իրականացնել շուրջ 3 միլիարդ ՀՀ դրամի ներդրում, որից առաջին տարում՝ մոտ 300,000,000 դրամ, 2-րդ տարում՝ մոտ 500,000,000 դրամ, 3-րդ տարում՝ մոտ 500,000,000 դրամ, 4-րդ տարում՝ մոտ 1,700,000,000 դրամ.

 ծրագրի իրագործումից հետո կձևավորվի համայնք-պետություն-մասնավոր հատված գործակցության հաջողված նախադեպ, որի շրջանակում լուծում կարող են ստանալ վաղուց առկախված նմանատիպ բազմաթիվ սոցիալական կնճռոտ խնդիրներ։