ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԱՀՄԱՆԱԴՐԱԿԱՆ ԴԱՏԱՐԱՆԻ
Ո Ր Ո Շ ՈՒ Մ Ը
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ԵՎ ԲԵԼԱՌՈՒՍԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՄԻՋԵՎ ՍՊԱՌԱԶԻՆՈՒԹՅԱՆ ԵՎ ՌԱԶՄԱԿԱՆ ՏԵԽՆԻԿԱՅԻ ՓՈԽԱԴԱՐՁԱԲԱՐ ՄԱՏԱԿԱՐԱՐՈՒՄՆԵՐԻ ՄԱՍԻՆ 2002 ԹՎԱԿԱՆԻ ՀՈՒՆԻՍԻ 6-ԻՆ ՄԻՆՍԿՈՒՄ ՍՏՈՐԱԳՐՎԱԾ ՀԱՄԱՁԱՅՆԱԳՐՈՒՄ ԱՄՐԱԳՐՎԱԾ ՊԱՐՏԱՎՈՐՈՒԹՅՈՒՆՆԵՐԻ` ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԱՀՄԱՆԱԴՐՈՒԹՅԱՆԸ ՀԱՄԱՊԱՏԱՍԽԱՆՈՒԹՅԱՆ ՀԱՐՑԸ ՈՐՈՇԵԼՈՒ ՎԵՐԱԲԵՐՅԱԼ ԳՈՐԾՈՎ
| Քաղ. Երևան |
10 սեպտեմբերի 2002 թ. |
Հայաստանի Հանրապետության սահմանադրական դատարանը, նախագահությամբ` սահմանադրական դատարանի նախագահ Գ. Հարությունյանի, կազմով` սահմանադրական դատարանի նախագահի տեղակալ Վ. Հովհաննիսյանի, սահմանադրական դատարանի անդամներ Ա. Գյուլումյանի, Ֆ. Թոխյանի, Հ. Նազարյանի, Ռ. Պապայանի, Վ. Պողոսյանի, Վ. Սահակյանի, Մ. Սևյանի,
մասնակցությամբ` Հայաստանի Հանրապետության Նախագահի պաշտոնական ներկայացուցիչ` Հայաստանի Հանրապետության պաշտպանության նախարար Ս. Սարգսյանի,
ղեկավարվելով Հայաստանի Հանրապետության Սահմանադրության 100 հոդվածի 2 կետով և 101 հոդվածի 1 կետով, «Սահմանադրական դատարանի մասին» Հայաստանի Հանրապետության օրենքի 5 հոդվածի 2 կետով, 25 հոդվածի 1 կետով, 21 և 56 հոդվածներով,
դռնբաց նիստում քննեց «Հայաստանի Հանրապետության կառավարության և Բելառուսի Հանրապետության կառավարության միջև սպառազինության և ռազմական տեխնիկայի փոխադարձաբար մատակարարումների մասին 2002 թվականի հունիսի 6-ին Մինսկում ստորագրված համաձայնագրում ամրագրված պարտավորությունների` Հայաստանի Հանրապետության Սահմանադրությանը համապատասխանության հարցը որոշելու վերաբերյալ» գործը:
Գործի քննության առիթը Հայաստանի Հանրապետության Նախագահի դիմումն է սահմանադրական դատարան:
Լսելով սույն գործով զեկուցող` Հայաստանի Հանրապետության սահմանադրական դատարանի անդամ Մ. Սևյանի հաղորդումը, Հայաստանի Հանրապետության Նախագահի ներկայացուցիչ Ս. Սարգսյանի բացատրությունը, հետազոտելով համաձայնագիրն ու գործում առկա մյուս փաստաթղթերը, Հայաստանի Հանրապետության սահմանադրական դատարանը ՊԱՐԶԵՑ.
1. Համաձայնագիրն ստորագրվել է 2002 թ. հունիսի 6-ին Մինսկում` Կողմերի միջև սպառազինության և ռազմական տեխնիկայի փոխադարձաբար մատակարարումների բնագավառում համագործակցություն իրականացնելու նպատակով:
Սույն համաձայնագիրը սերտորեն առնչվում է Հայաստանի Հանրապետության` ԱՊՀ-ի շրջանակներում իրականացվող ռազմական և ռազմատեխնիկական համագործակցությանը:
2. Համաձայնագիրը նպատակաուղղված է երկկողմ պայմանավորվածությունների հաստատմամբ և ծրագրերի իրագործմամբ նպաստելու սպառազինության, ռազմական արտադրանքի փոխմատակարարումների, ռազմական արդյունաբերության և այլ բնագավառներում համագործակցելու միջոցով երկու երկրների պաշտպանական ներուժերի ամրապնդմանը:
3. Սույն համաձայնագրով սահմանվում են սպառազինության և ռազմական տեխնիկայի մշակման, արտադրության, արդիականացման, նորոգման ու մատակարարման իրականացման կարգը, համաձայնագրի դրույթների անմիջական իրագործման համար նշանակվող լիազորված մարմինները, կարգավորվում են սպառազինության և ռազմական տեխնիկայի փոխադարձաբար մատակարարումների պլանների մշակման, Կողմերի տնտեսավարող սուբյեկտների միջև սպառազինության և ռազմական տեխնիկայի արտադրության, արդիականացման և նորոգման համար անհրաժեշտ ապրանքների փոխադարձաբար մատակարարումների իրականացման հետ կապված և մի շարք այլ հարցեր:
4. Համաձայնագրի դրույթների իրագործման ընթացքում Կողմերը ղեկավարվում են սպառազինության և ռազմական տեխնիկայի մշակման, արտադրության, մատակարարման, ստանդարտացման հարցերը կարգավորող` ինչպես գործող ներպետական, այնպես էլ միջազգային նորմատիվ-տեխնիկական փաստաթղթերով:
5. Կողմերը պարտավորվում են չլիցենզավորել և չքվոտավորել ցանկերի համաձայն մատակարարվող արտադրանքը, միմյանց տարածքներում մաքսային վճարներ չգանձել այդ ապրանքներից, միմյանց տեխնիկական օգնություն ցուցաբերել սպառազինության և ռազմական տեխնիկայի վերականգնման և սպասարկման ուղղությամբ, ապահովել սույն համաձայնագրի շրջանակներում համագործակցության ընթացքում ստացված տեղեկության պահպանումը, ինչպես նաև պահպանել գաղտնիության համաձայնեցված աստիճանը:
6. Կողմերը նախատեսել են նաև դրույթներ համաձայնագրի մեկնաբանման հետ կապված տարաձայնությունների լուծման, համաձայնագրի ուժի մեջ մտնելու, կատարման ժամկետի և դադարեցման, ինչպես նաև դրանում փոփոխություններ ու լրացումներ կատարելու կարգի վերաբերյալ:
7. Համաձայնագիրը կնքված է երկու բնօրինակով, յուրաքանչյուրը` հայերեն, բելառուսերեն և ռուսերեն, ընդ որում, բոլոր տեքստերը հավասարազոր են: Համաձայնագրի դրույթների մեկնաբանման դեպքում նախապատվությունը կտրվի ռուսերեն տեքստին:
Ելնելով գործի քննության արդյունքներից և ղեկավարվելով Հայաստանի Հանրապետության Սահմանադրության 100 հոդվածի 2 կետով, 102 հոդվածի առաջին և երրորդ մասերով, «Սահմանադրական դատարանի մասին» Հայաստանի Հանրապետության օրենքի 5 հոդվածի 2 կետով, 67 և 68 հոդվածներով, Հայաստանի Հանրապետության սահմանադրական դատարանը ՈՐՈՇԵՑ.
1. Հայաստանի Հանրապետության կառավարության և Բելառուսի Հանրապետության կառավարության միջև սպառազինության և ռազմական տեխնիկայի փոխադարձաբար մատակարարումների մասին 2002 թվականի հունիսի 6-ին Մինսկում ստորագրված համաձայնագրում ամրագրված պարտավորությունները համապատասխանում են Հայաստանի Հանրապետության Սահմանադրությանը:
2. Հայաստանի Հանրապետության Սահմանադրության 102 հոդվածի երկրորդ մասի համաձայն սույն որոշումը վերջնական է, վերանայման ենթակա չէ, ուժի մեջ է մտնում հրապարակման պահից:
|
Հայաստանի Հանրապետության |
Գ. Հարությունյան |
|
|
| Փոփոխող ակտ | Համապատասխան ինկորպորացիան |
|---|
| Փոփոխող ակտ | Համապատասխան ինկորպորացիան |
|---|