Հայաստանի Հանրապետության Կառավարություն
Ո Ր Ո Շ ՈՒ Մ
23 սեպտեմբերի 1993 թվականի N 477
Քաղ. երևան
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ԵՎ ԼԻՏՎԱԿԱՆ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՄԻՋԵՎ 1993 ԹՎԱԿԱՆԻ ԱՌԵՎՏՐԱՏՆՏԵՍԱԿԱՆ ՀԱՄԱԳՈՐԾԱԿՑՈՒԹՅԱՆ ՎԵՐԱԲԵՐՅԱԼ ԱՐՁԱՆԱԳՐՈՒԹՅԱՄԲ ՆԱԽԱՏԵՍՎԱԾ ՊԱՐՏԱՎՈՐՈՒԹՅՈՒՆՆԵՐԻ ԿԱՏԱՐՄԱՆ ԱՊԱՀՈՎՄԱՆ ՄԻՋՈՑԱՌՈՒՄՆԵՐԻ ՄԱՍԻՆ
Հայաստանի Հանրապետության կառավարության և Լիտվական Հանրապետության կառավարության միջև 1993 թվականի առևտրատնտեսական համագործակցության վերաբերյալ արձանագրությամբ նախատեսված պարտավորությունների կատարման ապահովման, ինչպես նաև ձևավորված տնտեսական կապերի պահպանման և զարգացման նպատակով Հայաստանի Հանրապետության կառավարությունը որոշում է.
1. Հայաստանի Հանրապետության էկոնոմիկայի նախարարությանը`
ա) Հայաստանի Հանրապետության 1993 թվականի պետական առաջադրանքներում ընդգրկել Հայաստանի Հանրապետությունից Լիտվական Հանրապետություն առաքվող կարևորագույն արտադրատեսակների ծավալները, համաձայն N 1 հավելվածի.
բ) տասնօրյա ժամկետում կատարել ներմուծվող ապրանքների քվոտաների բաշխումը՝ ըստ Հայաստանի Հանրապետության նախարարությունների, պետական վարչությունների, գերատեսչությունների, ձեռնարկությունների և կազմակերպությունների, համաձայն N 2 հավելվածի։
2. Հայաստանի Հանրապետության նախարարություններին, պետական վարչություններին, գերատեսչություններին, ձեռնարկություններին և կազմակերպություններին՝ մեկամսյա ժամկետում ավարտել Հայաստանի Հանրապետության կառավարության և Լիտվական Հանրապետության կառավարության միջև 1993 թվականի առևտրատնտեսական համագործակցության վերաբերյալ արձանագրության հավելվածներում նշված ապրանքների ծավալների փոխադարձ առաքումների վերաբերյալ տնտեսական պայմանագրերի կնքումը։
3. Հայաստանի Հանրապետության տրանսպորտի և հաղորդակցության նախարարությանը (երկաթգծին), Հայաստանի Հանրապետության կառավարությանն առընթեր քաղաքացիական ավիացիայի գլխավոր վարչությանը և Հայաստանի Հանրապետության մաքսային վարչությանը՝ երկշաբաթյա ժամկետում Լիտվական Հանրապետության հետ կնքել համաձայնագրեր` համապատասխան ոլորտներում համագործակցության վերաբերյալ։
4. Հայաստանի Հանրապետության վիճակագրության, պետական ռեգիստրի և վերլուծության պետական վարչությանը՝ համապատասխան նախարարությունների և գերատեսչությունների հետ համատեղ, Հայաստանի Հանրապետության և Լիտվական Հանրապետության միջև փոխադարձ առաքումների վերաբերյալ եռամսյակը մեկ անգամ կազմել վիճակագրական հաշվետվություն և ներկայացնել Հայաստանի Հանրապետության կառավարություն, համաձայն Հայաստանի Հանրապետության Նախարարների խորհրդի 1990 թվականի դեկտեմբերի 7-ի «Հայաստանի Հանրապետության 1991 թվականի միջհանրապետական համաձայնագրերով պարտավորությունների կատարման ապահովման միջոցառումների մասին» N 563 որոշման։
5. Սահմանել, որ սույն որոշման NN 1 և 2 հավելվածներում նշված արտադրատեխնիկական նշանակության արտադրատեսակների և ժողովրդական սպառման ապրանքների 1993 թվականի փոխադարձ առաքումների կարգավորման պատասխանատվությունը, համաձայն կնքված պայմանագրերի, դրվում է Հայաստանի Հանրապետության նախարարությունների և գերատեսչությունների վրա։
6. Սույն որոշմամբ նախատեսված միջոցառումների իրականացման վերահսկողությունը դնել Հայաստանի Հանրապետության էկոնոմիկայի նախարարության վրա։
|
Հայաստանի Հանրապետության վարչապետ |
Հ. Բագրատյան |
|
Հայաստանի Հանրապետության կառավարության գործերի կառավարիչ |
Ա. Խաչատրյան |