ՀՀ ԿԱՌԱՎԱՐՈՒԹՅԱՆ ՈՐՈՇՈՒՄԸ ՎԱՐԿԵՐԻ ՄԱՐՄԱՆ ԺԱՄԿԵՏՆԵՐԸ ՀԵՏԱՁԳԵԼՈՒ ՄԱՍԻՆ

Հայաստանի Հանրապետության Կառավարություն

Ո Ր Ո Շ ՈՒ Մ

10 ապրիլի 1993 թ. N 164

Քաղ. Երևան

ՎԱՐԿԵՐԻ ՄԱՐՄԱՆ ԺԱՄԿԵՏՆԵՐԸ ՀԵՏԱՁԳԵԼՈՒ ՄԱՍԻՆ

Հաշվի առնելով գյուղացիական, գյուղացիական կոլեկտիվ տնտեսությունների և մյուս գյուղատնտեսական ձեռնարկությունների ու կազմակերպությունների մեծ մասի անվճարունակությունը, Ռուսաստանի Դաշնությունից այլ երկրներ նավթամթերքների արտահանման կարգի էական փոփոխությունները և արգելքները, ինչպես նաև ելնելով շրջափակման պայմաններում նավթամթերքների ներկրումն ապահովելու անհրաժեշտությունից, Հայաստանի Հանրապետության կառավարությունը որոշում է.

1. Հայաստանի Հանրապետության կառավարության 1992 թվականի սեպտեմբերի 12-ի N 380 կարգադրությամբ հացահատիկի և կարտոֆիլի սերմերի ձեռքբերման համար հատկացված, սակայն չմարված 274 մլն ռուբլի վարկի մարման ժամկետը հետաձգել մինչև 1993 թվականի հոկտեմբերի 1-ը։

2. Հայաստանի Հանրապետության կառավարության 1993 թվականի հունվարի 23-ի N 15 որոշումով էներգակիրների և պահեստամասերի ձեռքբերման համար հատկացված, սակայն չմարված 1029 մլն ռուբլի վարկի մարման ժամկետը հետաձգել մինչև 1993 թվականի հոկտեմբերի 1-ը։

Հայաստանի Հանրապետության վարչապետ	Հ. Բագրատյան
Հայաստանի Հանրապետության կառավարության գործերի կառավարիչ	Ա. Խաչատրյան