ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
Ո Ր Ո Շ ՈՒ Մ
2 հուլիսի 2026 թվականի N 951-Ն
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2021 ԹՎԱԿԱՆԻ ՀՈՒԼԻՍԻ 15-Ի N 1169-Ն ՈՐՈՇՄԱՆ ՄԵՋ ԼՐԱՑՈՒՄՆԵՐ ԵՎ ՓՈՓՈԽՈՒԹՅՈՒՆ ԿԱՏԱՐԵԼՈՒ ՄԱՍԻՆ
Ղեկավարվելով «Նորմատիվ իրավական ակտերի մասին» օրենքի 33-րդ և 34-րդ հոդվածների 1-ին մասերով՝ Հայաստանի Հանրապետության կառավարությունը որոշում է.
1. Հայաստանի Հանրապետության կառավարության 2021 թվականի հուլիսի 15-ի «Նախադպրոցական ուսումնական հաստատությունների՝ պետական բյուջեից մեկ սանի հաշվարկով ֆինանսավորման կարգը, այդ թվում՝ կրթության և զարգացման առանձնահատուկ պայմանների ապահովման համար անհրաժեշտ նպատակային ֆինանսավորման չափաքանակը սահմանելու մասին» N 1169-Ն որոշման (այսուհետ՝ որոշում)՝
1) 2-րդ կետի՝
ա. 1-ին ենթակետից հետո լրացնել հետևյալ բովանդակությամբ նոր՝ 1.2-րդ ենթակետով.
«1.2) պետական և համայնքային բյուջեներից նախադպրոցական ուսումնական հաստատությունների ֆինանսավորման համար 2027 թվականի սեպտեմբերի 1-ից հիմք են հանդիսանում հաստատությունների կողմից «Կրթության կառավարման տեղեկատվական համակարգում» մուտքագրված տվյալները.».
բ. 2-րդ ենթակետի «ատեստավորման» բառը փոխարինել «տարակարգի շնորհման» բառերով:
2. Որոշման հավելվածի՝
1) 2-րդ կետը լրացնել հետևյալ բովանդակությամբ նոր՝ 5-րդ ենթակետով՝
«5) ոչ պետական նախադպրոցական ուսումնական հաստատության «Ավագ» տարիքային խումբ (5-6 տարեկան) հաճախող այն երեխաները, որոնք առնվազն 9 ամիս հերթագրված են եղել համայնքային նախադպրոցական ուսումնական հաստատությունում, սակայն համայնքային նախադպրոցական ուսումնական հաստատություններում առկա հերթերի պատճառով, ինչպես նաև նույն տևողությամբ նախադպրոցական ծառայության բացակայությամբ պայմանավորված՝ չեն ընդգրկվել սաների համակազմում:».
2) 3-րդ կետը «նշված խմբերում» բառերից հետո լրացնել «(բացառությամբ 5-րդ ենթակետի)» բառերով:
3. Որոշման հավելվածը լրացնել հետևյալ բովանդակությամբ նոր՝ 14-րդ և 15-րդ կետերով՝
«14. Սույն հավելվածի 2-րդ կետի 5-րդ ենթակետով սահմանված խմբի մեկ սանի հաշվով (սույն հավելվածով նախատեսվող) ծառայության արժեքի մինչև 50 տոկոսը՝ համայնքի կողմից ֆինանսավորման դեպքում, մնացած մինչև 50 տոկոսը ֆինանսավորվում է պետական բյուջեի միջոցներով՝ սույն կարգով սահմանված մեկ սանի հաշվով ֆինանսավորման չափի սահմաններում։ Ծնողական համավճարը չի կարող գերազանցել սույն հավելվածով նախատեսվող պետական բյուջեից մեկ սանի հաշվարկով ֆինանսավորման չափաքանակի 80%-ը:
15. Սույն հավելվածի 2-րդ կետի 5-րդ ենթակետով սահմանված խմբի սաների ֆինանսավորումն իրականացվում է հետևյալ հաջորդականությամբ՝
1) Երևան, Աբովյան և Վանաձոր քաղաքային բնակավայրերում՝ սկսած 2027 թվականի սեպտեմբերի 1-ից.
2) հանրապետության մյուս քաղաքային բնակավայրերում՝ սկսած 2028 թվականի սեպտեմբերի 1-ից:»:
4. Սույն որոշումն ուժի մեջ է մտնում 2027 թվականի սեպտեմբերի 1-ից:
|
Հայաստանի Հանրապետության |
Ն. Փաշինյան |
|
Երևան |
|
02.07.2026 ՀԱՎԱՍՏՎԱԾ Է ԷԼԵԿՏՐՈՆԱՅԻՆ ՍՏՈՐԱԳՐՈՒԹՅԱՄԲ |
Պաշտոնական հրապարակման օրը՝ 2 հուլիսի 2026 թվական: