ՀՀ ՓՈԽՎԱՐՉԱՊԵՏԻ ՈՐՈՇՈՒՄԸ ՀԱՅԿԱԿԱՆ ԲԱՐԵԳՈՐԾԱԿԱՆ ԸՆԴՀԱՆՈՒՐ ՄԻՈՒԹՅԱՆ ՀԱՅԱՍՏԱՆԻ ՆԵՐԿԱՅԱՑՈՒՑՉՈՒԹՅԱՆ ԿՈՂՄԻՑ ԻՐԱԿԱՆԱՑՎՈՂ «ՆԱԻՐԻ» ՃԱՄԲԱՐԻ ԿԱԶՄԱԿԵՐՊՈՒՄ» ԾՐԱԳՐԻ ՄԱՍԻՆ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՓՈԽՎԱՐՉԱՊԵՏ

Ո Ր Ո Շ ՈՒ Մ

N 147-Ա

Հիմք ընդունելով «Բարեգործության մասին» օրենքի 13-րդ հոդվածի 2-րդ մասի 1-ին և 3-րդ կետերը՝

1. Բարեգործական որակել Հայկական բարեգործական ընդհանուր միության Հայաստանի ներկայացուցչության կողմից իրականացվող՝ 126,000,000 դրամ ընդհանուր արժողությամբ «Նաիրի» ճամբարի կազմակերպում» ծրագիրը՝ համաձայն հավելվածի:

2. Սահմանել, որ Հայկական բարեգործական ընդհանուր միության Հայաստանի ներկայացուցչության կողմից (ՀՎՀՀ՝ 00006479) «Նորալուսին» ՍՊԸ-ի (ՀՎՀՀ` 08602616) հետ 2026 թվականի փետրվարի 12-ին կնքված պայմանագրում նշված գործարքը, որով նախատեսվում է 2026 թվականի հունիսի 8-ից մինչև 2026 թվականի օգոստոսի 22-ն ընկած ժամանակահատվածում կեցության և սննդի ապահովման ծառայությունների մատուցում՝ 126,000,000 դրամի չափով, առանց ավելացված արժեքի հարկի, անմիջականորեն կապված է սույն որոշման 1-ին կետում նշված ծրագրի իրականացման հետ և դրա համար ունի զգալի նշանակություն:

3. Հայկական բարեգործական ընդհանուր միության Հայաստանի ներկայա- ցուցչությանը՝ ծրագրի ավարտից հետո մեկամսյա ժամկետում Հայաստանի Հանրապետության կառավարության 2003 թվականի հունվարի 16-ի N 66-Ն որոշմամբ հաստատված բարեգործական ծրագրերը բարեգործական որակելու և գրանցելու կարգի 25-րդ կետով սահմանված կարգով ներկայացնել ամփոփ տեղեկություններ՝ ծրագրի կատարման մասին:

Հայաստանի Հանրապետության փոխվարչապետ	Տ. Խաչատրյան
Երևան

17.03.2026 ՀԱՎԱՍՏՎԱԾ Է ԷԼԵԿՏՐՈՆԱՅԻՆ ՍՏՈՐԱԳՐՈՒԹՅԱՄԲ

Հավելված ՀՀ փոխվարչապետի N 147-Ա որոշման

1.	Ծրագրի նպատակը	Հայկական բարեգործական ընդհանուր միությունը (ՀԲԸՄ) կազմակերպում է ամառային անհատույց ճամբար՝ 44-օրյա պատերազմում նահատակված, գերի ընկած, վիրավորված, անհետ կորած հերոսների զավակների, քույրերի և եղբայրների, ինչպես նաև Արցախից տեղահանված երեխաների (7-13 տարեկան, ծնված՝ 2013-2019 թթ.) համար։ Ծրագրի նպատակն է երեխաներին պարգևել անմոռանալի և զվարճանքներով լի ամառ։ Ծրագրի շրջանակներում երեխաները կանցկացնեն ուրախ և ակտիվ հաճելի ժամանց, բնության գրկում կվայելեն ամառային արձակուրդները, ձեռք կբերեն նոր ընկերներ, ինչպես նաև կծանոթանան հայ ազգային պարերին, կզարգացնեն ստեղծագործելու, մտածելու և նորը ստեղծելու ունակությունները։
2.	Ծրագրի բարեգործական որակման նպատակը	Օրենքով սահմանված կարգով օգտվել ՀՀ հարկերի, տուրքերի և պարտադիր վճարների գծով արտոնություններից։
3.	Բարեգործը	Հայկական բարեգործական ընդհանուր միություն (ՀԲԸՄ) (գրանցված` ԱՄՆ, Դելավերի նահանգ, Նյու Քեսլ համայնք, 19808 ք. Վիլմինգթոն, Սենթրվիլ փ. 2711, #400 հասցեում, «29» մարտի 1955թ., գրանցման համար` 486313)
4.	Ծրագրի կատարողը	Հայկական բարեգործական ընդհանուր միության (ՀԲԸՄ) Հայաստանի ներկայացուցչություն (Հայաստանի Հանրապետություն, քաղ. Երևան, Մելիք-Ադամյան 2/2, ՀՎՀՀ՝ 00006479)
5.	Ծրագրի իրականացման վայրը և բնագավառը	Հայաստանի Հանրապետություն, Կոտայքի մարզ, Փյունիկ գյուղ, «Զեփյուռ» ճամբար, սոցիալական
6.	Ծրագրի բյուջեն	126,000,000 դրամ
7.	Բարեգործություն ստացողը	44-օրյա պատերազմում նահատակված, գերի ընկած, վիրավորված, անհետ կորած հերոսների զավակները, քույրերը և եղբայրները, ինչպես նաև Լեռնային Ղարաբաղից տեղահանված 7-13 տարեկան երեխաներ
8.	Ծրագրի իրականացման տևողությունը	2026 թվականի հունիսի 8-ից մինչև 2026 թվականի սեպտեմբերի 10-ը
9.	Միջոցառումների նկարագրությունը և ժամկետները, անհրաժեշտ ֆինանսական միջոցների ծավալը	Կոտայքի մարզի Փյունիկ գյուղում նախատեսվում է կազմակերպել ամառային ճամբար: Մասնակից երեխաների համար կազմակերպվելու է էքսկուրսիաներ և արշավներ դեպի հետաքրքիր ու տեսարժան վայրեր: Երեխաներին սովորեցնելու են ձեռքի աշխատանք, խաղալու են սպորտային խաղեր (ֆուտբոլ, բասկետբոլ, վոլեյբոլ, թենիս), լող, ինչպես նաև կազմակերպվելու է ինտելեկտուալ և ուսուցողական խաղեր: Ճամբարում տեղի է ունենալու հայ ազգային երգ ու պարի միջոցառումներ, ինչպես նաև օրվա ընթացքում երեխաները հնարավորություն կունենան դիտելու իրենց տարիքին համապատասխան մուլտֆիլմեր, ֆիլմեր և ունենալ դրանց վերաբերյալ քննարկումներ: Երեկոյան ժամերին նախատեսվում է կազմակերպել ուրախ և ակտիվ ժամանցային ծրագիր: Ճամբարը կազմակերպվելու է երեք հերթափոխով՝ 1-ին՝ հունիսի 8-17-ը ներառյալ, 2-րդ՝ օգոստոսի 3-12-ը ներառյալ և 3-րդ՝ օգոստոսի 13-22-ը ներառյալ: Յուրաքանչյուր հերթափոխի մասնակցության նվազագույն քանակը՝ 240 երեխա։ Երեխաներին տրամադրվելու է երեքանգամյա սնունդ, որը պատրաստվելու է տեղում։ Նախատեսվում է իրականացնել 2026 թվականի հունիսի 8-ից մինչև 2026 թվականի սեպտեմբերի 10-ն ընկած ժամանակահատվածում՝ 126,000,000 դրամի չափով։
10.	Ձեռք բերվող (ներմուծվող) ապրանքների ու ծառայությունների համառոտ նկարագիրը, ծավալները և նախատեսվող գինը	Ճամբարում երեխաների կեցության և սննդի ձեռքբերման ծառայություններ՝ 126,000,000 դրամ, առանց ավելացված արժեքի հարկի:
	Ծրագրի իրականացման հետ կապված կազմակերպչական ծախսերը	Ծրագրի իրականացման հետ կապված կազմակերպչական ծախսեր չեն նախատեսվում:
12.	Համագործակցությունը պետական կառավարման, տեղական ինքնակառավարման մարմինների, այլ կազմակերպությունների հետ	Չի նախատեսվում:
13.	Ծրագրի արդյունավետության նկատմամբ վերահսկողության մեխանիզմների նկարագրությունը	ՀՀ կառավարության 2003 թ․ հունվարի 16-ի N 66-Ն որոշմամբ հաստատված բարեգործական ծրագրերը բարեգործական որակելու և գրանցելու կարգի 25-րդ կետով սահմանված կարգով:

Հայաստանի Հանրապետության փոխվարչապետ

Տ. Խաչատրյան

17.03.2026 ՀԱՎԱՍՏՎԱԾ Է ԷԼԵԿՏՐՈՆԱՅԻՆ ՍՏՈՐԱԳՐՈՒԹՅԱՄԲ