ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԱՐԴԱՐԱԴԱՏՈՒԹՅԱՆ ՆԱԽԱՐԱՐ

«11» դեկտԵՄԲԵՐԻ 2025 թ. քաղ. Երևան

N 822-Ն

Հ Ր Ա Մ Ա Ն

Ղեկավարվելով «Կատարողական վարույթի մասին» օրենքի 78-րդ հոդվածի 6-րդ մասով և «Նորմատիվ իրավական ակտերի մասին» օրենքի 37-րդ հոդվածով.

1. Սահմանել հարկադիր աճուրդի հրապարակային ծանուցման և մասնակիցների գրանցման կարգը՝ համաձայն Հավելվածի:

2. Ուժը կորցրած ճանաչել Հայաստանի Հանրապետության արդարադատության նախարարի 2006 թվականի օգոստոսի 30-ի «Հարկադիր էլեկտրոնային աճուրդի հրապարակային ծանուցման և մասնակիցների գրանցման կարգը սահմանելու մասին» թիվ 167-Ն հրամանը։

3. Սույն հրամանն ուժի մեջ է մտնում «Կատարողական վարույթի մասին» օրենքն ուժի մեջ մտնելու օրը:

Ս. ԳԱԼՅԱՆ

Հավելված Արդարադատության նախարարի 2025 թվականի դեկտեմբերի 11-ի N 822-Ն հրամանի

1. Սույն կարգով սահմանվում է Հարկադիր կատարումն ապահովող ծառայության (այսուհետ՝ Ծառայություն) կողմից անցկացվող հարկադիր աճուրդի հրապարակային ծանուցման և մասնակիցների գրանցման կարգը:

2. Հարկադիր աճուրդը կազմակերպվում է էլեկտրոնային համակարգի կիրառմամբ։

3․ Հարկադիր աճուրդի մասին հրապարակային ծանուցումը հրապարակվում է Ծառայության աճուրդի ինտերնետային պաշտոնական կայքում` www.ajurd.am (այսուհետ՝ Կայք):

4. Հարկադիր աճուրդի մասին հրապարակային ծանուցումը պետք է պարունակի «Կատարողական վարույթի մասին» օրենքի 78-րդ հոդվածի 4-րդ մասով նախատեսված տեղեկությունները:

5. Հարկադիր աճուրդին մասնակցելու համար անձը կարող է գրանցվել Կայքի միջոցով կամ այցելել Ծառայության վարչական շենք (մարզային ստորաբաժանումներ)։

6․ Կայքի միջոցով գրանցվելիս մասնակիցը մուտքագրում է հետևյալ տվյալները՝

1) ֆիզիկական անձի անունը, ազգանունը, քաղաքացիությունը, անձնագրի կամ նույնականացման քարտի համարը, ծննդյան օրը, ամիսն ու տարեթիվը, հաշվառման հասցեն, հանրային ծառայությունների համարանիշը, էլեկտրոնային փոստի հասցեն, հեռախոսահամարը և գաղտնաբառը,

2) իրավաբանական անձի անվանումը, կազմակերպաիրավական ձևը, հիմնադրման պետությունը, պետական գրանցման համարը, ՀՎՀՀ-ն կամ օտարերկրյա պետությունում կիրառելի այլ համապատասխան նույնականացնող տվյալներ, գտնվելու վայրի հասցեն, էլեկտրոնային փոստի հասցեն, հեռախոսահամարը և գաղտնաբառը:

7․ Տվյալները մուտքագրելուց հետո մասնակիցը ստանում է օգտագործողի անունը (այսուհետ՝ օգտանուն), այնուհետև նախընտրած լոտի մեկնարկային գնի 5%-ի չափով նախավճար է մուտքագրում վճարային (Vpos) համակարգի միջոցով:

8․ Ծառայության վարչական շենք այցելելու դեպքում մասնակիցը ներկայացնում է անձը հաստատող փաստաթուղթ (իրավաբանական անձանց ներկայացուցիչները ներկայացնում են նաև իրավաբանական անձի անունից հանդես գալու իրավասությունը (լիազորությունը) հաստատող փաստաթղթեր), և լոտի մեկնարկային գնի 5% նախավճարը Ծառայության համապատասխան բանկային հաշվին փոխանցելու փաստը հավաստող անդորրագիր, ինչպես նաև համապատասխան էլեկտրոնային հասցեն:

9. Գրանցումից հետո մասնակցին տրվում է աճուրդի մասնակցության թերթիկ, որտեղ նշվում են Ծառայության ինտերնետային կայքի հասցեն, աճուրդի մասնակցի օգտանունը, գաղտնաբառը և սույն կարգի 6-րդ կետով նախատեսված տվյալները։

10․ Մասնակիցը հարկադիր աճուրդին մասնակցում է՝ Կայքի համապատասխան դաշտում լրացնելով տրված օգտանունը և գաղտնաբառը։

Պաշտոնական հրապարակման օրը՝ 15 դեկտեմբերի 2025 թվական: