ՀՀ ԿԱՌԱՎԱՐՈՒԹՅԱՆ ՈՐՈՇՈՒՄԸ «ՏԱՇԻՐԻ ԿԱՐԻ ՖԱԲՐԻԿԱ» ՊԵՏԱԿԱՆ ՁԵՌՆԱՐԿՈՒԹՅՈՒՆԸ ԲԱՑ ԲԱԺՆԵՏԻՐԱԿԱՆ ԸՆԿԵՐՈՒԹՅԱՆ ՁԵՎՈՎ ՍԵՓԱԿԱՆԱՇՆՈՐՀԵԼՈՒ ՄԱՍԻՆ

«Վավերացնում եմ»
Հայաստանի Հանրապետության
նախագահ Լ. ՏԵՐ-Պետրոսյան
«20» սեպտեմբերի 1995 թ.

Ո Ր Ո Շ ՈՒ Մ

20 սեպտեմբերի 1995 թ. N 18

Քաղ. Երևան

Հայաստանի Հանրապետության կառավարությունը որոշում է.

1. Սեփականաշնորհել «Տաշիրի կարի ֆաբրիկա» պետական ձեռնարկությունը՝ «Տաշիրի կարի ֆաբրիկա» բաց բաժնետիրական ընկերություն ստեղծելու միջոցով։

2. «Տաշիրի կարի ֆաբրիկա» պետական ձեռնարկությունը սեփականաշնորհվում է որպես գույքային համալիր։

3. «Տաշիրի կարի ֆաբրիկա» պետական ձեռնարկության ֆոնդերը համարվում են պետական սեփականություն և սեփականաշնորհման ժամանակ չեն կարող օգտագործվել որպես վճարման միջոց:

4. Սահմանել ընկերության նախնական կանոնադրական հիմնադրամը՝ 10035 հազ. դրամ, որից բաժանորդագրության ենթակա մասը` 8028 հազ. դրամ։

5. Վճարման ենթակա պասսիվները կազմում են 1476 հազ. դրամ:

6. Ընկերության նախնական կանոնադրական հիմնադրամի բաժանորդագրության ենթակա մասը համապատասխանում է 4012 բաժնետոմսի`  յուրաքանչյուրը 2000 դրամ անվանական արժեքով։

7. Առաջարկել Հայաստանի Հանրապետության սեփականաշնորհման և ապապետականացման պետական հանձնաժողովին՝

ա) հաստատել «Տաշիրի կարի ֆաբրիկա» բաց բաժնետիրական ընկերության կանոնադրությունը և ընկերությունը սահմանված կարգով գրանցել Հայաստանի Հանրապետության ձեռնարկությունների պետական ռեգիստրում.

բ) Հայաստանի Հանրապետության օրենսդրությամբ սահմանված կարգով գրանցել ընկերության արժեթղթերի թողարկման ազդագիրը և այն հրապարակել մամուլում.

8. Սահմանել, որ «Տաշիրի կարի ֆաբրիկա» բաց բաժնետիրական ընկերության աշխատավորական կոլեկտիվի անդամներին վերապահված բաժնետոմսերի բաժանորդագրությունն սկսվում է ոչ շուտ, քան բաժնետոմսերի թողարկման ազդագրի հրապարակումից 10 օր հետո և ավարտվում մեկ ամսվա ընթացքում։

9. Սահմանել, որ «Տաշիրի կարի ֆաբրիկա» բաց բաժնետիրական ընկերության բաժնետոմսերի ազատ բաժանորդագրությունն սկսվում է ոչ շուտ, քան բաժնետոմսերի թողարկման ազդագրի հրապարակումից 10 օր հետո և ավարտվում 35 օրվա ընթացքում։

10. Հայաստանի Հանրապետության պետական ունեցվածքի հաշվառման և ապապետականացման վարչությանը՝

ա) սահմանված կարգով Հայխնայբանկում բացել «Տաշիրի կարի ֆաբրիկա» բաց բաժնետիրական ընկերության ժամանակավոր հաշիվը և ազդագրի հրապարակումից հետո 10-օրյա ժամկետում սկսել բաժանորդագրությունը.

բ) «Տաշիրի կարի ֆաբրիկա» բաց բաժնետիրական ընկերության սեփականաշնորհման պայմանագրում նշել մանկապարտեզի բնույթի (պրոֆիլի) պահպանման մասին։

11. Սույն որոշումն ուժի մեջ է մտնում 1995 թվականի սեպտեմբերի 20-ից:

Հայաստանի Հանրապետության վարչապետ

Հ. ԲԱԳՐԱՏյան