ԵՎՐԱՍԻԱԿԱՆ ՏՆՏԵՍԱԿԱՆ ՀԱՆՁՆԱԺՈՂՈՎԻ ԿՈԼԵԳԻԱՅԻ ԿԱՐԳԱԴՐՈՒԹՅՈՒՆԸ ԵՎՐԱՍԻԱԿԱՆ ՏՆՏԵՍԱԿԱՆ ՀԱՆՁՆԱԺՈՂՈՎԻ ԵՎ ԿԵՆՏՐՈՆԱԿԱՆ ԱՄԵՐԻԿԱՅՈՒՄ ՏՆՏԵՍԱԿԱՆ ԻՆՏԵԳՐՄԱՆ ՀԱՐՑԵՐՈՎ ՔԱՐՏՈՒՂԱՐՈՒԹՅԱՆ ՄԻՋԵՎ ՓՈԽԸՄԲՌՆՄԱՆ ՀՈՒՇԱԳՐԻ ՆԱԽԱԳԾԻ ՄԱՍԻՆ

ԵՎՐԱՍԻԱԿԱՆ ՏՆՏԵՍԱԿԱՆ ՀԱՆՁՆԱԺՈՂՈՎ

ԿՈԼԵԳԻԱ

ԵՎՐԱՍԻԱԿԱՆ ՏՆՏԵՍԱԿԱՆ ՀԱՆՁՆԱԺՈՂՈՎԻ ԵՎ ԿԵՆՏՐՈՆԱԿԱՆ ԱՄԵՐԻԿԱՅՈՒՄ ՏՆՏԵՍԱԿԱՆ ԻՆՏԵԳՐՄԱՆ ՀԱՐՑԵՐՈՎ ՔԱՐՏՈՒՂԱՐՈՒԹՅԱՆ ՄԻՋԵՎ ՓՈԽԸՄԲՌՆՄԱՆ ՀՈՒՇԱԳՐԻ ՆԱԽԱԳԾԻ ՄԱՍԻՆ

1. Հավանություն տալ Եվրասիական տնտեսական հանձնաժողովի և Կենտրոնական Ամերիկայում տնտեսական ինտեգրման հարցերով քարտուղարության միջև փոխըմբռնման հուշագրի նախագծին (կցվում է):

Հանձնարարել Եվրասիական տնտեսական հանձնաժողովի կոլեգիայի՝ ինտեգրման և մակրոտնտեսության հարցերով անդամ (նախարար) Ս. Յու. Գլազևին՝ ստորագրել նշված հուշագիրը, թույլատրելով դրա ստորագրման վերաբերյալ բանակցությունների ընթացքում կցվող նախագծում կատարել սկզբունքային բնույթ չունեցող փոփոխություններ:

2. Սույն կարգադրությունն ուժի մեջ է մտնում դրա ընդունման օրվանից:

Նախագիծ

ՀՈՒՇԱԳԻՐ

Եվրասիական տնտեսական հանձնաժողովի և Կենտրոնական Ամերիկայում տնտեսական ինտեգրման հարցերով քարտուղարության միջև փոխըմբռնման

Եվրասիական տնտեսական հանձնաժողովը, որը Եվրասիական տնտեսական միության մշտապես գործող կանոնակարգող մարմին է, և Կենտրոնական Ամերիկայում տնտեսական ինտեգրման հարցերով քարտուղարությունը, որը Կենտրոնական Ամերիկայում տնտեսական ինտեգրման գործընթացի տեխնիկական և վարչական մարմին է, այսուհետ՝ Կողմեր,

հաշվի առնելով Կողմերի համատեղ շահագրգռվածությունը երկխոսություն հաստատելու հարցում` Եվրասիական տնտեսական հանձնաժողովի և Կենտրոնական Ամերիկայի տնտեսական ինտեգրման հարցերով քարտուղարության փոխգործակցության միջոցով փոխշահավետ տնտեսական համագործակցությունը զարգացնելու և Եվրասիական տնտեսական միության անդամ պետությունների և Կենտրոնական Ամերիկայում տնտեսական ինտեգրման ենթահամակարգի մասնակից երկրների միջև առևտրի ընդլայնմանն ու դիվերսիֆիկացմանն աջակցելու նպատակով,

հաստատելով նվիրվածությունը միջազգային իրավունքի սկզբունքներին,

հանգել են փոխըմբռնման հետևյալի մասին.

1. Սույն հուշագրի նպատակը բազմակողմանի համագործակցությունն է Եվրասիական տնտեսական հանձնաժողովի և Կենտրոնական Ամերիկայում տնտեսական ինտեգրման հարցերով քարտուղարության միջև՝ տնտեսական ոլորտում փոխգործակցության ամրապնդման, տարածաշրջանային առևտրի փոխադարձ խթանման և կայուն զարգացման, տարածաշրջանային ինտեգրման զարգացման փորձի փոխանակման համար, ինչպես նաև համագործակցություն սույն հուշագրի 2-րդ կետում նշված ուղղություններով՝ «Եվրասիական տնտեսական միության մասին» 2014 թվականի մայիսի 29-ի պայմանագրի, «Կենտրոնական Ամերիկայում ինտեգրման մասին ընդհանուր պայմանագրի» 1993 թվականի հոկտեմբերի 29-ի արձանագրության (Գվատեմալայի արձանագրության) և «Կենտրոնական Ամերիկայում տնտեսական ինտեգրման հարցերով քարտուղարության» 2014 թվականի ապրիլի 25-ի ընթացակարգի կանոնների շրջանակներում:

2. Կողմերն իրենց իրավասության շրջանակներում նպատակ ունեն իրականացնելու համագործակցություն հետևյալ ուղղություններով՝

տարածաշրջանային տնտեսական ինտեգրում.

մակրոտնտեսություն.

մաքսային կանոնակարգում.

փոխադարձ առևտուր.

տեխնիկական կանոնակարգում և ստանդարտացում.

սանիտարական և բուսասանիտարական միջոցներ.

տրանսպորտ.

էներգետիկա.

մրցակցություն և հակամենաշնորհային կանոնակարգում.

ներքին շուկաների պաշտպանություն.

պետական գնումներ.

սակագնային և ոչ սակագնային միջոցներ.

արդյունաբերություն.

ագրոարդյունաբերական համալիր.

ծառայությունների առևտուր և ներդրումներ.

մտավոր սեփականություն.

թվային էկոնոմիկա.

ներքին շուկաների գործունեություն.

առևտրատնտեսական վեճերի կարգավորում (հաշտարարություն).

սպառողների իրավունքների պաշտպանություն.

աշխատանքային միգրացիա և սոցիալական պաշտպանություն.

փոխադարձ շահագրգռվածություն ներկայացնող այլ ուղղություններ:

3. Եվրասիական տնտեսական միության անդամ պետությունների և Եվրասիական տնտեսական հանձնաժողովի, Կենտրոնական Ամերիկայում տնտեսական ինտեգրման ենթահամակարգի մասնակից երկրների և Կենտրոնական Ամերիկայում տնտեսական ինտեգրման հարցերով քարտուղարության իրավասության ոլորտի հարցերը կքննարկվեն դրանց մասնակցությամբ:

4. Համագործակցությունը սույն հուշագրի իրագործման շրջանակներում կարող է իրականացվել հետևյալի միջոցով՝

փոխադարձ հետաքրքրություն ներկայացնող հարցերի վերաբերյալ վերլուծական աշխատանքների և զեկույցների համատեղ հրապարակումներ.

Կողմերի իրավասության ոլորտում ներառված հարցերի վերաբերյալ փորձի և տեղեկատվության փոխանակում.

Կողմերի միջև տնտեսական համագործակցության զարգացման վերաբերյալ հանձնարարականների մշակում.

համաժողովների, ֆորումների, սեմինարների, տոնավաճառների և ցուցահանդեսների, խորհրդատվությունների և կլոր սեղանների նախապատրաստում և անցկացում, այդ թվում՝ Եվրասիական տնտեսական միության անդամ պետությունների և Կենտրոնական Ամերիկայում տնտեսական ինտեգրման ենթահամակարգի մասնակից երկրների գործարար շրջանակների ներկայացուցիչների մասնակցությամբ.

Կողմերի կողմից անցկացվող միջոցառումներին մասնակցություն:

5. Սույն հուշագրի իրագործման նպատակով՝ Կողմերը կարող են մշակել համագործակցության զարգացման վերաբերյալ համատեղ ծրագրեր:

6. Փոխգործակցությունը սույն հուշագրի իրագործման նպատակով կիրականացվի Կողմերի ներկայացուցիչներից ձևավորվող՝ Եվրասիական տնտեսական հանձնաժողովի և Կենտրոնական Ամերիկայում տնտեսական ինտեգրման հարցերով քարտուղարության միջև համագործակցության համատեղ աշխատանքային խմբի շրջանակներում (այսուհետ՝ աշխատանքային խումբ):

Աշխատանքային խմբի նիստերը կանցկացվեն ըստ անհրաժեշտության, բայց առնվազն տարին մեկ անգամ: Նիստի անցկացման ժամանակը և վայրը, կազմը, ձևաչափը և օրակարգը կսահմանվեն Կողմերի կողմից: Աշխատանքային խմբի նիստերի արդյունքները կձևակերպվեն արձանագրություններով:

Աշխատանքային խմբի գործունեության կազմակերպչատեխնիկական ապահովումն իրականացվում է ընդունող Կողմի կողմից:

Յուրաքանչյուր Կողմ ինքնուրույն է կրում աշխատանքային խմբի գործունեությանը իր ներկայացուցիչների մասնակցության հետ կապված ծախսերը:

7. Սույն հուշագիրը չի ենթադրում սահմանափակ հասանելիություն ունեցող տեղեկատվության փոխանակում՝ Եվրասիական տնտեսական միության իրավունքի մաս կազմող միջազգային պայմանագրերին ու ակտերին և Կենտրոնական Ամերիկայում տնտեսական ինտեգրման ենթահամակարգի փաստաթղթերին, ինչպես նաև Եվրասիական տնտեսական միության անդամ պետությունների և Կենտրոնական Ամերիկայում տնտեսական ինտեգրման ենթահամակարգի մասնակից երկրների օրենսդրությանը համապատասխան:

8. Կողմերը տեղեկատվությունը կօգտագործեն միայն սույն հուշագիրը իրագործելու նպատակով և առանց այդ տեղեկատվությունը տրամադրած Կողմի գրավոր համաձայնության՝ չեն բացահայտի այդ տեղեկատվությունը:

Եվրասիական տնտեսական հանձնաժողովը Եվրասիական տնտեսական միության անդամ պետություններին տրամադրում է Կենտրոնական Ամերիկայում տնտեսական ինտեգրման հարցերով քարուղարությունից ստացված տեղեկատվություն՝ առանց վերջինիս գրավոր համաձայնության: Կենտրոնական Ամերիկայում տնտեսական ինտեգրման հարցերով քարտուղարությունը տրամադրում է Կենտրոնական Ամերիկայում տնտեսական ինտեգրման ենթահամակարգի մասնակից երկրներին Եվրասիական տնտեսական հանձնաժողովից ստացված տեղեկատվություն՝ առանց վերջինիս գրավոր համաձայնության:

9. Սույն հուշագրի իրագործման շրջանակներում տեղեկատվության փոխանակումն իրականացվելու է անգլերենով:

10. Սույն հուշագիրը միջազգային պայմանագիր չէ, չի առաջացնում միջազգային իրավունքով կանոնակարգվող իրավունքներ և պարտականություններ:

11. Սույն հուշագիրը կիրառվում է դրա ստորագրման օրվանից:

12. Կողմերի փոխադարձ համաձայնությամբ՝ սույն հուշագրում կարող են կատարվել փոփոխություններ՝ համապատասխան արձանագրություն ստորագրելու միջոցով:

13. Սույն հուշագրի իրագործման հետ կապված ցանկացած ֆինանսական ծախսեր Կողմերի կողմից համաձայնեցվելու են յուրաքանչյուր կոնկրետ դեպքում՝ հաշվի առնելով միջոցների, անձնակազմի և այլ ռեսուրսների առկայությունը:

14. Կողմերից յուրաքանչյուրը միակողմանի կարգով իրավունք ունի դադարեցնելու սույն հուշագրի կիրառումը՝ այդ մասին գրավոր ծանուցելով մյուս Կողմին: Սույն հուշագրի կիրառումը դադարում է մյուս Կողմի կողմից նման ծանուցում ստանալու օրվանից 30 օրացուցային օրը լրանալուց հետո: Սույն հուշագրի կիրառման դադարումը չի ազդում դրա կիրառման ընթացքում սկսված միջոցառումների և նախագծերի ավարտման վրա, եթե Կողմերն այլ բանի համար չպայմանավորվեն:

Ստորագրված է ________ քաղաքում, 20___ թվականի __________ -ի «___»-ին, երկու օրինակից՝ յուրաքանչյուրը ռուսերեն, իսպաներեն և անգլերեն:

Որևէ տարընթերցում առաջանալու դեպքում օգտագործվում է անգլերեն տեքստը: