ԵՎՐԱՍԻԱԿԱՆ ՏՆՏԵՍԱԿԱՆ ՀԱՆՁՆԱԺՈՂՈՎԻ ԿՈԼԵԳԻԱՅԻ ԿԱՐԳԱԴՐՈՒԹՅՈՒՆԸ «ԵՎՐԱՍԻԱԿԱՆ ՏՆՏԵՍԱԿԱՆ ՀԱՆՁՆԱԺՈՂՈՎԻ ԵՎ ԽԱՂԱՂՕՎԿԻԱՆՈՍՅԱՆ ԴԱՇԻՆՔԻ ՄԻՋԵՎ ԳՈՐԾԸՆԿԵՐՈՒԹՅԱՆ ՄԱՍԻՆ» ՀՌՉԱԿԱԳՐԻ ՆԱԽԱԳԾԻ ՎԵՐԱԲԵՐՅԱԼ

ԵՎՐԱՍԻԱԿԱՆ ՏՆՏԵՍԱԿԱՆ ՀԱՆՁՆԱԺՈՂՈՎ
ԿՈԼԵԳԻԱ

21 մայիսի 2019 թվականի

թիվ 89

քաղ. Մոսկվա

«ԵՎՐԱՍԻԱԿԱՆ ՏՆՏԵՍԱԿԱՆ ՀԱՆՁՆԱԺՈՂՈՎԻ ԵՎ ԽԱՂԱՂՕՎԿԻԱՆՈՍՅԱՆ ԴԱՇԻՆՔԻ ՄԻՋԵՎ ԳՈՐԾԸՆԿԵՐՈՒԹՅԱՆ ՄԱՍԻՆ» ՀՌՉԱԿԱԳՐԻ ՆԱԽԱԳԾԻ ՎԵՐԱԲԵՐՅԱԼ

1. «Հավանություն տալ Եվրասիական տնտեսական հանձնաժողովի և Խաղաղօվկիանոսյան դաշինքի միջև գործընկերության մասին» հռչակագրի նախագծին (կցվում է)։

Հանձնարարել Եվրասիական տնտեսական հանձնաժողովի՝ ինտեգրման և մակրոտնտեսության հարցերով կոլեգիայի անդամ (նախարար) Տ.Դ. Վալովայային ստորագրել նշված Հռչակագիրը՝ թույլատրելով այն ստորագրելու մասին բանակցությունների ընթացքում կից ներկայացվող նախագծում կատարել սկզբունքային բնույթ չունեցող փոփոխություններ։

2. Սույն կարգադրությունն ուժի մեջ է մտնում դրա ընդունման օրվանից։

Եվրասիական տնտեսական հանձնաժողովի կոլեգիայի նախագահ՝

Տ. Սարգսյան

Նախագիծ

ՀՌՉԱԿԱԳԻՐ

Եվրասիական տնտեսական հանձնաժողովի և Խաղաղօվկիանոսյան դաշինքի միջև գործընկերության մասին

Եվրասիական տնտեսական հանձնաժողովը՝ մի կողմից, և Խաղաղօվկիանոսյան դաշինքի անդամ պետությունները (Կոլումբիայի Հանրապետությունը, Մեքսիկայի Միացյալ Նահանգները, Պերուի Հանրապետությունը և Չիլիի Հանրապետությունը)՝ մյուս կողմից, այսուհետ՝ Կողմեր՝

ցանկություն հայտնելով հիմք դնել Եվրասիական տնտեսական միության անդամ պետությունների և Խաղաղօվկիանոսյան դաշինքի մասնակից պետությունների միջև բազմակողմանի համագործակցության համար,

կարևորելով աջակցությունը Եվրասիական տնտեսական միության անդամ պետությունների և Խաղաղօվկիանոսյան դաշինքի մասնակից պետությունների կայուն սոցիալ-տնտեսական զարգացմանը,

Ճանաչելով Եվրասիական տնտեսական միության և Խաղաղօվկիանոսյան դաշինքի դերի կարևորությունը ժամանակակից համաշխարհային տնտեսության ճարտարապետության մեջ,

հիմնվելով «Եվրասիական տնտեսական միության մասին» 2014 թվականի մայիսի 29-ի պայմանագրի և «Խաղաղօվկիանոսյան դաշինքի մասին» 2012 թվականի հունիսի 6-ի շրջանակային համաձայնագրի վրա,

ընդգծելով առաջընթացը Եվրասիական տնտեսական միության և Խաղաղօվկիանոսյան դաշինքի կողմից ձեռք բերված՝ ապրանքների, ծառայությունների, կապիտալի և աշխատուժի ազատ տեղաշարժի ապահովման հարցում,

հաստատելով Եվրասիական տնտեսական միության և Խաղաղօվկիանոսյան դաշինքի՝ այլ երկրների և ինտեգրացիոն միավորումների հետ համագործակցության համար բաց լինելը,

ձգտելով փոխադարձ հետաքրքրություն ներկայացնող ոլորտներում Եվրասիական տնտեսական միության անդամ պետությունների և Խաղաղօվկիանոսյան դաշինքի մասնակից պետությունների միջև երկխոսության ընդլայնմանը, առևտրային կապերի խորացմանն ու համագործակցության ամրապնդմանը,

հայտնում են՝

ամուր, արդյունավետ և երկարատև հարաբերությունների կառուցման ձգտման մասին, որոնք հիմնված են փոխադարձ հարգանքի, բաց լինելու, փոխշահավետ համագործակցության և հավասարության վրա.

Եվրասիական տնտեսական միության անդամ պետությունների և Խաղաղօվկիանոսյան դաշինքի մասնակից պետությունների միջև կոոպերացիոն կապերի հաստատման և առևտրատնտեսական հարաբերությունների խորացման գործում հետաքրքրության մասին.

համագործակցության փոխշահավետ ուղղություններն ուսումնասիրելու որոշման մասին, այդ թվում՝ տարածաշրջանային տնտեսական ինտեգրման ոլորտում, առևտրի ընթացակարգերի պարզեցման ոլորտում և փոխադարձ հետաքրքրություն ներկայացնող մյուս ոլորտներում.

Եվրասիական տնտեսական միության անդամ պետությունների և Խաղաղօվկիանոսյան դաշինքի մասնակից պետությունների միջև առևտրում տեխնիկական խոչընդոտների նվազեցման կարևորությունը ճանաչելու մասին.

Եվրասիական տնտեսական հանձնաժողովի և Խաղաղօվկիանոսյան դաշինքի մասնակից պետությունների ներկայացուցիչների միջև կանոնավոր աշխատանքային հանդիպումների իրականացման ձգտման մասին.

Եվրասիական տնտեսական միության անդամ պետությունների և Խաղաղօվկիանոսյան դաշինքի մասնակից պետությունների գործարար համայնքների ներկայացուցիչների միջև շփումների զարգացմանը և գործնական առաքելությունների կազմակերպմանն աջակցելու մտադրության մասին:

Եվրասիական տնտեսական հանձնաժողովի և Խաղաղօվկիանոսյան դաշինքի մասնակից պետությունների միջև համագործակցության ձևերը կհամաձայնեցվեն Կողմերի կողմից:

Սույն հռչակագիրը միջազգային պայմանագիր չէ, դրա Կողմերի համար չի առաջացնում միջազգային իրավունքով կարգավորվող իրավունքներ ու պարտավորություններ և Կողմերի վրա ֆինանսական պարտավորություններ չի դնում։

Ստորագրված է _______ քաղաքում 2019 թվականի _____________ «_____»-ին, երկու օրինակից, յուրաքանչյուրը՝ ռուսերենով և անգլերենով: Տարընթերցումների դեպքում օգտագործվում է անգլերեն տեքստը։

Եվրասիական տնտեսական հանձնաժողովի կողմից՝	Խաղաղօվկիանոսյան դաշինքի կողմից՝
	Կոլումբիայի Հանրապետությունից՝
	Մեքսիկայի Միացյալ Նահանգներից՝
	Պերուի Հանրապետությունից՝
	Չիլիի Հանրապետությունից՝