ԵՎՐԱՍԻԱԿԱՆ ՏՆՏԵՍԱԿԱՆ ՀԱՆՁՆԱԺՈՂՈՎ

ԿՈԼԵԳԻԱ

1. Հավանություն տալ «Եվրասիական տնտեսական միության շրջանակներում գյուղատնտեսական կենդանիների հետ սելեկցիոն տոհմային աշխատանքի կատարման միասնականացմանն ուղղված միջոցների մասին» համաձայնագրի նախագծին (կցվում է) և ուղարկել այն Եվրասիական տնտեսական միության անդամ պետություններ՝ ներպետական համաձայնեցում անցկացնելու նպատակով:

2. Եվրասիական տնտեսական միության անդամ պետություններին՝ մինչև 2016 թվականի նոյեմբերի 1-ը Եվրասիական տնտեսական հանձնաժողովին տեղեկացնել սույն կարգադրության 1-ին կետում նշված hամաձայնագրի նախագծի ներպետական համաձայնեցումն անցկացնելու արդյունքների մասին։

3. Սույն կարգադրությունն ուժի մեջ է մտնում դրա ընդունման օրվանից։

Նախագիծ

Եվրասիական տնտեսական միության անդամ պետությունները, այսուհետ՝ անդամ պետություններ,

հիմնվելով «Եվրասիական տնտեսական միության մասին» 2014 թվականի մայիսի 29-ի պայմանագրի XXV բաժնի դրույթների վրա,

ձգտելով մեծացնել մրցունակ գյուղատնտեսական արտադրանքի արտադրության ծավալները,

հաշվի առնելով, որ գյուղատնտեսական կենդանիների արտադրողականությունը զգալիորեն կախված է տոհմային կենդանիների օգտագործումից, համաձայնեցին հետևյալի մասին.

Հոդված 1

Սույն համաձայնագիրը մշակված է համաձայնեցված (համակարգված) ագրոարդյունաբերական քաղաքականություն իրականացնելու նպատակով, և դրանով կարգավորվում է Եվրասիական տնտեսական միության շրջանակներում գյուղատնտեսական կենդանիների հետ սելեկցիոն տոհմային աշխատանքի կատարումը:

Անդամ պետությունների տարածքներում գյուղատնտեսական կենդանիների հետ սելեկցիոն տոհմային աշխատանքի կատարումն իրականացվում է՝ հաշվի առնելով սույն համաձայնագրի դրույթները:

Հոդված 2

Սույն համաձայնագրի նպատակներով օգտագործվում են հասկացություններ, որոնք ունեն հետևյալ իմաստը՝

տոհմային արտադրանք՝ տոհմային կենդանի, դրա սերմը, սաղմերը, թրթուրները, մեղվափաթեթները.

տոհմային արժեք՝ տոհմային կենդանուց, տոհմային հոտից ընտրվող հատկանիշների մակարդակը և դրանք սերնդին փոխանցելու հնարավորությունը.

տոհմային կենդանի՝ բուծման համար օգտագործվող գյուղատնտեսական կենդանի, որն ունի տոհմային վկայական (վկայագիր, անձնագիր) և գրանցված է պետական ռեեստրում (տոհմային գրքում).

սելեկցիոն տոհմային աշխատանք՝ համալիր միջոցառումներ, որոնք ուղղված են գյուղատնտեսական կենդանիների տոհմային և մթերատու հատկանիշների կատարելագործմանը.

գյուղատնտեսական կենդանիներ՝ կենդանիներ, որոնց բուծում են անասնաբուծական և այլ գյուղատնտեսական արտադրանք ստանալու նպատակով:

Հոդված 3

Եվրասիական տնտեսական միության շրջանակներում տոհմային արտադրանքի արտադրության ոլորտում միասնական պահանջների կիրառման նպատակով սելեկցիոն տոհմային աշխատանք կատարելիս անդամ պետություններն իրականացնում են գյուղատնտեսական կենդանիների՝ ստեղծված նոր տեսակների, շարքերի (ցեղատեսակների) և խաչասերումների փորձարկում անցկացնելու, տոհմային արտադրանքի մոլեկուլային գենետիկ փորձաքննություն անցկացնելու, հարակից ցեղատեսակների օգտագործմամբ ստացված տոհմային կենդանիների ցեղատեսակը որոշելու, ինչպես նաև տոհմային արժեքը գնահատելու միասնականացում՝ սույն համաձայնագրին համապատասխան:

Գյուղատնտեսական կենդանիների՝ ստեղծված նոր տեսակների, շարքերի (ցեղատեսակների) և խաչասերումների փորձարկում անցկացնելու կարգը, տոհմային արտադրանքի մոլեկուլային գենետիկ փորձաքննություն անցկացնելու կարգը, հարակից ցեղատեսակների օգտագործմամբ ստացված տոհմային կենդանիների ցեղատեսակը որոշելու կարգը, ինչպես նաև տոհմային արժեքը գնահատելու մեթոդիկաները հաստատվում են Եվրասիական տնտեսական հանձնաժողովի (այսուհետ՝ Հանձնաժողով) կողմից:

Հոդված 4

Եվրասիական տնտեսական միության շրջանակներում նորարարական տեխնոլոգիաների, այդ թվում՝ գենոմային սելեկցիայի մշակման և ներդրման նպատակով՝ տոհմային անասնաբուծության ոլորտում անդամ պետություններում անցկացվող սելեկցիոն տոհմային աշխատանքի համակարգումն ու վերլուծական ապահովումն իրականացվում են Եվրասիական միջկառավարական խորհրդի կողմից սահմանվող կարգով՝ Եվրասիական միջկառավարական խորհրդի կողմից որոշվող՝ անդամ պետությունների գործող հաստատությունների հիմքի վրա:

Հոդված 5

Անդամ պետություններն ապահովում են տոհմային կենդանիների և սելեկցիոն ձեռքբերումների վերաբերյալ տեղեկությունների փոխանակման կազմակերպումը, այդ թվում՝ էլեկտրոնային ձևով:

Փոխանակման ենթակա տեղեկությունների կազմը և այդպիսի փոխանակման կարգը հաստատվում են Հանձնաժողովի կողմից:

Հոդված 6

Մինչև սույն համաձայնագրի 3-րդ հոդվածով նախատեսված կարգերի և մեթոդիկաների հաստատման վերաբերյալ Հանձնաժողովի ակտերն ուժի մեջ մտնելը՝ անդամ պետություններում կիրառվում են անդամ պետությունների օրենսդրությամբ նախատեսված համապատասխան կարգերն ու մեթոդիկաները:

Հոդված 7

Սույն համաձայնագիրը Եվրասիական տնտեսական միության շրջանակներում կնքված միջազգային պայմանագիր է և Եվրասիական տնտեսական միության իրավունքի մաս է կազմում։

Հոդված 8

Սույն համաձայնագրի կիրառման և (կամ) մեկնաբանման հետ կապված վեճերը կարգավորվում են «Եվրասիական տնտեսական միության մասին» 2014 թվականի մայիսի 29-ի պայմանագրով սահմանված կարգով:

Հոդված 9

Անդամ պետությունների փոխադարձ համաձայնությամբ՝ սույն համաձայնագրում կարող են կատարվել փոփոխություններ և լրացումներ, որոնք ձևակերպվում են առանձին արձանագրություններով և կազմում են սույն համաձայնագրի անբաժանելի մասը։

Հոդված 10

Սույն համաձայնագիրն ուժի մեջ է մտնում սույն համաձայնագիրն ուժի մեջ մտնելու համար անհրաժեշտ ներպետական ընթացակարգերն անդամ պետությունների կողմից կատարված լինելու մասին վերջին գրավոր ծանուցումն ավանդապահի կողմից դիվանագիտական ուղիներով ստանալու օրվանից 30 օրացուցային օրը լրանալուց հետո։

Կատարված է ——————քաղաքում, 201__ թվականի ____________, մեկ բնօրինակից՝ ռուսերենով։

Սույն համաձայնագրի բնօրինակը պահվում է Եվրասիական տնտեսական հանձնաժողովում, որը՝ որպես սույն համաձայնագրի ավանդապահ, յուրաքանչյուր անդամ պետություն կուղարկի դրա հաստատված պատճենը։