ԵՎՐԱՍԻԱԿԱՆ ՏՆՏԵՍԱԿԱՆ ՀԱՆՁՆԱԺՈՂՈՎԻ ԽՈՐՀՐԴԻ ՈՐՈՇՈՒՄԸ ԵՎՐԱՍԻԱԿԱՆ ՏՆՏԵՍԱԿԱՆ ՄԻՈՒԹՅԱՆ ԱՆԴԱՄ ՊԵՏՈՒԹՅՈՒՆՆԵՐԻ ՀԱՎԱՏԱՐՄԱԳՐՄԱՆ ՄԱՐՄԻՆՆԵՐԻ ՓՈԽԳՈՐԾԱԿՑՈՒԹՅԱՆ ԿԱՐԳԻ ՄԱՍԻՆ՝ ԲՈՂՈՔՆԵՐԻ ԵՎ ԲՈՂՈՔԱՐԿՈՒՄՆԵՐԻ ՈՒՍՈՒՄՆԱՍԻՐՄԱՆ ՄԱՍՈՎ

ԽՈՐՀՈՒՐԴ

Ո Ր Ո Շ ՈՒ Մ

6 սեպտեմբերի 2024 թվականի

թիվ 65

քաղ. Մոսկվա

«Համապատասխանության գնահատման մարմինների հավատարմագրման աշխատանքների արդյունքները ճանաչելու մասին» արձանագրության («Եվրասիական տնտեսական միության մասին» 2014 թվականի մայիսի 29-ի պայմանագրի թիվ 11 հավելված) 41 կետի իրագործման նպատակով և Եվրասիական տնտեսական բարձրագույն խորհրդի 2014 թվականի դեկտեմբերի 23-ի թիվ 98 որոշմամբ հաստատված՝ Եվրասիական տնտեսական հանձնաժողովի աշխատանքի կանոնակարգի թիվ 1 հավելվածի 424 կետին համապատասխան՝ Եվրասիական տնտեսական հանձնաժողովի խորհուրդը որոշեց.

1. Հաստատել Եվրասիական տնտեսական միության անդամ պետությունների հավատարմագրման մարմինների՝ բողոքների և բողոքարկումների ուսումնասիրման մասով փոխգործակցության կից ներկայացվող կարգը։

2. Սույն որոշումն ուժի մեջ է մտնում դրա պաշտոնական հրապարակման օրվանից 30օրացուցային օրը լրանալուց հետո:

Եվրասիական տնտեսական հանձնաժողովի խորհրդի անդամներ՝

Հայաստանի Հանրապետությունից՝	Բելառուսի Հանրապետությունից`	Ղազախստանի Հանրապետությունից`	Ղրղզստանի Հանրապետությունից՝	Ռուսաստանի Դաշնությունից՝
Մ. Գրիգորյան	Ի. Պետրիշենկո	Ս. Ժումանգարին	Ա. Կասիմալիև	Ա. Օվերչուկ

ՀԱՎԵԼՎԱԾ Եվրասիական տնտեսական հանձնաժողովի խորհրդի 2024 թվականի սեպտեմբերի 6-ի թիվ 65 որոշման

1. Սույն կարգը մշակվել է «Համապատասխանության գնահատման մարմինների հավատարմագրման աշխատանքների արդյունքները ճանաչելու մասին» արձանագրության («Եվրասիական տնտեսական միության մասին» 2014 թվականի մայիսի 29-ի պայմանագրի թիվ 11 հավելված) 41 կետին համապատասխան՝ Եվրասիական տնտեսական միության անդամ պետությունների (այսուհետ համապատասխանաբար՝ Միություն, անդամ պետություններ) հավատարմագրման մարմինների կողմից նշված արձանագրության 4-րդ կետի 4-րդ և 5-րդ ենթակետերին համապատասխան ընդունված որոշումների մասին տեղեկատվության փոխանակում ապահովելու նպատակով։

2. Սույն կարգը սահմանում է անդամ պետությունների հավատարմագրման մարմինների (այսուհետ՝ հավատարմագրման մարմիններ) տեղեկատվական փոխգործակցության կարգը՝ հետևյալի փոխանակման մասով.

ա) անդամ պետությունների ֆիզիկական կամ իրավաբանական անձանցից ստացվող բողոքների ուսումնասիրման արդյունքների մասին տեղեկատվություն՝

այլ անդամ պետության հավատարմագրման մարմնի կողմից հավատարմագրված և Միության համապատասխանության գնահատման մարմինների միասնական ռեեստրում ընդգրկված համապատասխանության գնահատման մարմնի (այսուհետ՝ համապատասխանության գնահատման մարմին) գործողությունների (անգործության) վերաբերյալ.

այլ անդամ պետության հավատարմագրման մարմնի գործողությունների (անգործության) վերաբերյալ.

բ) հավատարմագրման մարմինների կողմից համապատասխանության գնահատման մարմինների հավատարմագրման վերաբերյալ ընդունված որոշումների վերանայման մասին բողոքարկումների ուսումնասիրման արդյունքների վերաբերյալ վիճակագրական տեղեկատվություն։

3. Սույն կարգի նպատակների համար «պատճառաբանված մերժում» հասկացությունը նշանակում է սույն կարգի 2-րդ կետի «ա» ենթակետին համապատասխան ստացված բողոքի (այսուհետ՝ բողոք) ուսումնասիրումը դադարեցնելու մասին տեղեկատվություն՝ նշելով մերժման պատճառները:

Սույն կարգում օգտագործվող մյուս հասկացությունները կիրառվում են «Եվրասիական տնտեսական միության շրջանակներում տեխնիկական կանոնակարգման մասին» արձանագրությամբ («Եվրասիական տնտեսական միության մասին» 2014 թվականի մայիսի 29-ի պայմանագրի թիվ 9 հավելված) և «Համապատասխանության գնահատման մարմինների հավատարմագրման աշխատանքների արդյունքները ճանաչելու մասին» արձանագրությամբ («Եվրասիական տնտեսական միության մասին» 2014 թվականի մայիսի 29-ի պայմանագրի թիվ 11 հավելված) սահմանված իմաստներով։

4. Բողոքների ուսումնասիրման արդյունքների վերաբերյալ հավատարմագրման մարմինների տեղեկատվական փոխգործակցությունն իրականացվում է համապատասխան տեղեկատվությունն էլեկտրոնային եղանակով և (կամ) թղթային կրիչով ուղարկելու միջոցով։

5. Սույն կարգի 2-րդ կետի «բ» ենթակետին համապատասխան բողոքարկման ուսումնասիրման արդյունքների վերաբերյալ վիճակագրական տեղեկատվության փոխանակման մասով հավատարմագրման մարմինների տեղեկատվական փոխգործակցությունն իրականացվում է «Ինտերնետ» տեղեկատվական-հեռահաղորդակցական ցանցում՝ հավատարմագրման մարմինների պաշտոնական կայքերում, այն տեղադրելու միջոցով՝ անդամ պետությունների օրենսդրությամբ սահմանված կարգով։

6. Հավատարմագրման մարմինը բողոքը ստանալու օրվանից 5 աշխատանքային օրվա ընթացքում սույն կարգի 7-րդ կետում նշված տեղեկատվությունն ուղարկում է այն անդամ պետության հավատարմագրման մարմին, որի տարածքում գրանցված է համապատասխանության գնահատման այն մարմինը, որի վերաբերյալ ստացվել է բողոքը, կամ սույն կարգի 8-րդ կետում նշված տեղեկատվությունը՝ այն հավատարմագրման մարմին, որի վերաբերյալ ստացվել է բողոքը, ինչպես նաև հավատարմագրման այլ մարմիններ և Եվրասիական տնտեսական հանձնաժողով (ի գիտություն)։

7. Մյուս անդամ պետության հավատարմագրման մարմնի կողմից հավատարմագրված համապատասխանության գնահատման մարմնի գործողությունների (անգործության) դեմ բողոքի մասին տեղեկատվությունը ներառում է հետևյալ տեղեկությունները.

ա) համապատասխանության գնահատման մարմնի (այն իրավաբանական անձի, որի կազմի մեջ է մտնում համապատասխանության գնահատման մարմինը) անվանումը, որի վերաբերյալ ստացվել է բողոքը, դրա եզակի նույնականացման համարը Միության համապատասխանության գնահատման մարմինների միասնական ռեեստրում՝ նշելով հավատարմագրման վկայագրի կարգավիճակը, գրանցման համարը և դրա գործողության ժամկետը.

բ) համապատասխանության գնահատման այն մարմնի կողմից տրված համապատասխանության գնահատման փաստաթղթերի գրանցման համարները, որոնց վերաբերյալ ստացվել է բողոքը, դրանց գործողության ժամկետը և կարգավիճակը Միության՝ տրված համապատասխանության սերտիֆիկատների և համապատասխանության մասին գրանցված հայտարարագրերի միասնական ռեեստրում, այլ ապացուցողական փաստաթղթեր (առկայության դեպքում).

գ) տեղեկություններ խախտման ենթադրյալ կազմի մասին՝ այդ թվում նշելով համապատասխանության գնահատման ընթացակարգերի և (կամ) Միության մարմինների ակտերի դրույթների պահանջների խախտումները։

8. Մյուս անդամ պետության հավատարմագրման մարմնի գործողությունների (անգործության) դեմ բողոքի մասին տեղեկատվությունը պարունակում է տեղեկություններ այդ հավատարմագրման մարմնի գործողությունների (անգործության) նկատմամբ դժգոհության մասին։

9. Սույն կարգի 6-րդ կետին համապատասխան տեղեկատվություն ստացած հավատարմագրման մարմինը այն ստանալու օրվանից ոչ ուշ, քան 10 աշխատանքային օր հետո տեղեկացնում է տեղեկատվությունն ուղարկած հավատարմագրման մարմնին՝ բողոքն ուսումնասիրման համար ընդունելու կամ պատճառաբանված մերժելու մասին:

10. Սույն կարգի 6-րդ կետին համապատասխան տեղեկատվություն ուղարկած հավատարմագրման մարմինը բողոքն ուսումնասիրման համար ընդունելու կամ պատճառաբանված մերժելու մասին տեղեկատվությունն ստանալու օրվանից հետո 5 աշխատանքային օրվա ընթացքում այդ մասին տեղեկացնում է բողոք ներկայացրած անձին, եթե անդամ պետության օրենսդրությամբ այլ ժամկետ սահմանված չէ։

11. Բողոքը քննության ընդունվելու դեպքում հավատարմագրման մարմինն այն ուսումնասիրում է ըստ էության՝ անդամ պետության օրենսդրությամբ սահմանված կարգով։

12. Բողոքի ուսումնասիրման ժամկետը չպետք է գերազանցի 25 աշխատանքային օրը՝ հավատարմագրման մարմնի կողմից բողոքը ուսումնասիրման համար ընդունվելու մասին տեղեկատվությունն ուղարկվելու օրվանից: Այն դեպքում, երբ բողոքի ուսումնասիրման ժամկետը գերազանցում է 25 աշխատանքային օրը, բողոքն ուսումնասիրման համար ընդունած հավատարմագրման մարմինն այդ մասին տեղեկացնում է սույն կարգի 6-րդ կետին համապատասխան տեղեկատվությունն ուղարկած հավատարմագրման մարմնին՝ նշելով բողոքի ուսումնասիրումը երկարաձգելու պատճառները: Բողոքի ուսումնասիրումը երկարաձգելու ժամկետը չպետք է գերազանցի 25 աշխատանքային օրը:

Սույն կարգի 6-րդ կետին համապատասխան տեղեկատվություն ուղարկած հավատարմագրման մարմինը բողոքի ուսումնասիրումը երկարաձգելու մասին տեղեկատվությունն ստանալու օրվանից հետո 5 աշխատանքային օրվա ընթացքում այդ մասին տեղեկացնում է բողոք ներկայացրած անձին, եթե անդամ պետության օրենսդրությամբ այլ ժամկետ սահմանված չէ։

13. Բողոքի ուսումնասիրման արդյունքներով սույն կարգի 6-րդ կետին համապատասխան տեղեկատվություն ստացած հավատարմագրման մարմինը բողոքի ուսումնասիրման արդյունքներով որոշում ընդունելու օրվանից 5 աշխատանքային օրվա ընթացքում այդ մասին տեղեկացնում է սույն կարգի 6-րդ կետին համապատասխան տեղեկատվություն ուղարկած հավատարմագրման մարմնին, ինչպես նաև հավատարմագրման մյուս մարմիններին և Եվրասիական տնտեսական հանձնաժողովին (ի գիտություն)՝ կցելով որոշումն ընդունելու համար հիմք հանդիսացած փաստաթղթերի պատճենները (անհրաժեշտության դեպքում)։

14. Բողոքի ուսումնասիրման արդյունքների վերաբերյալ տեղեկատվություն ստանալուց հետո սույն կարգի 6-րդ կետին համապատասխան տեղեկատվություն ուղարկած հավատարմագրման մարմինն արդյունքների մասին տեղեկացնում է բողոք ներկայացրած անձին՝ նշված տեղեկատվությունն ստանալու օրվանից 5 աշխատանքային օրվա ընթացքում, եթե անդամ պետության օրենսդրությամբ այլ ժամկետ սահմանված չէ։

15. Եվրասիական տնտեսական հանձնաժողովը տարին մեկ անգամ Միության պաշտոնական կայքում հրապարակում է սույն կարգին համապատասխան հավատարմագրման մարմինների փոխգործակցության արդյունքների մասին վիճակագրական տեղեկատվությունը՝ բողոքների ուսումնասիրման արդյունքների վերաբերյալ։

Պաշտոնական հրապարակման օրը՝ 29 օգոստոսի 2025 թվական: