ՀՀ ԿԵՆՏՐՈՆԱԿԱՆ ԲԱՆԿԻ ԽՈՐՀՐԴԻ ՈՐՈՇՈՒՄԸ ՀՀ ՏԱՐԱԾՔՈՒՄ ԳՈՐԾՈՂ ԲԱՆԿԵՐԻՑ ԸՍՏ ՀԱՆՐԱՊԵՏՈՒԹՅԱՆ ՄԱՐԶԵՐԻ ԲԱՆԿԵՐԻ ՎԱՐԿԱՅԻՆ ՆԵՐԴՐՈՒՄՆԵՐԻ ԵՎ ՆԵՐԳՐԱՎԱԾ ՄԻՋՈՑՆԵՐԻ ՎԵՐԱԲԵՐՅԱԼ ՄԵԿԱՆԳԱՄՅԱ ՀԱՇՎԵՏՎՈՒԹՅՈՒՆ ՍՏԱՆԱԼՈՒ ՄԱՍԻՆ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԿԵՆՏՐՈՆԱԿԱՆ ԲԱՆԿԻ ԽՈՐՀՈՒՐԴ

22 հունվարի 2002 թվականի

թիվ 25

Ո Ր Ո Շ ՈՒ Մ

Ղեկավարվելով «Հայաստանի Հանրապետության կենտրոնական բանկի մասին» Հայաստանի Հանրապետության օրենքի 20-րդ և «Բանկերի և բանկային գործունեության մասին» Հայաստանի Հանրապետության օրենքի 55-րդ հոդվածների դրույթներով` Հայաստանի Հանրապետության կենտրոնական բանկի խորհուրդը որոշում է.

1. Հաստատել ըստ հանրապետության մարզերի, 2002 թվականի հունվարի 1-ի դրությամբ բանկերի կողմից տրամադրված վարկերի և ներգրաված միջոցների վերաբերյալ մեկանգամյա հաշվետվության ձևը (կցվում է):

2. Հանձնարարել Հայաստանի Հանրապետության տարածքում գործող բանկերին` մինչև 2002 թվականի փետրվարի 15-ը ներկայացնել «2002 թվականի հունվարի 1-ի դրությամբ բանկերի կողմից տրամադրված վարկերի և ներգրաված միջոցների վերաբերյալ» մեկանգամյա հաշվետվություն:

3. Հանձնարարել Հայաստանի Հանրապետության կենտրոնական բանկի մակրոտնտեսական և բանկային հետազոտությունների կենտրոնին` բանկերից համապատասխան տվյալները ստանալուց հետո ամփոփել և ներկայացնել Հայաստանի Հանրապետության կենտրոնական բանկի խորհրդի սույն թվականի ապրիլ ամսվա 1-ին նիստին:

4. Սույն որոշման 2-րդ կետի կատարման հսկողությունը դնել Հայաստանի Հանրապետության կենտրոնական բանկի բանկային վերահսկողության դեպարտամենտի վրա:

5. Սույն որոշումն ուժի մեջ է մտնում ընդունման պահից:

Ըստ հանրապետության մարզերի բանկերի վարկային ներդրումների, ներգրաված միջոցների վերաբերյալ» հաշվետվությունը լրացվում է ըստ մարզերի տրված վարկերի և ներգրաված միջոցների հաշվեկշռային մնացորդի գումարի չափով:

«I. Վարկային ներդրումներ» բաժինը լրացվում է հետևյալ կերպ.

1-ին կետի «Ըստ ճյուղերի տրված վարկեր» ենթակետերը լրացվում են համաձայն վարկառուի ճյուղային պատկանելության: Ընդ որում, աղյուսակի սյուներում վարկերի աշխարհագրական դասակարգումը կատարվում է ելնելով վարկերի նպատակային օգտագործումից` բիզնես-ծրագրերի հիման վրա, ոչ թե ըստ վարկառուների գրանցման վայրի:

1-ին կետի «1.8. Սպառողական վարկեր» ենթակետում լրացվում են ֆիզիկական անձանց տրված վարկերը, բացառությամբ նպատակային վարկերի, որոնք համաձայն վարկային պայմանագրի, ուղղված են տնտեսական գործունեության ծավալմանը` ներկայացված համապատասխան բիզնես-ծրագրի հիման վրա: Ֆիզիկական անձանց տրված նպատակային վարկերը դասակարգվում են մյուս վարկերի նման:

2-րդ կետի «2.1. ժամկետանց» ենթակետում բոլոր հաշվեկշռային ժամկետանց վարկերը ցույց են տրվում միայն «մինչև մեկ տարի»` համապատասխան արժույթի սյունակներում, և ներառվում են ինչպես մեկ տարի, այնպես էլ մեկ տարուց ավելի ժամկետով տրված վարկերը:

2-րդ կետի «2.2. Միջազգային ծրագրերով տրամադրված վարկեր» ենթակետում ներկայացվում են միջազգային ծրագրերով բանկի կողմից տրամադրված վարկերը:

2-րդ կետի «2.3. Փոքր և միջին բիզնեսին տրամադրված վարկեր» ենթակետում լրացվում են միայն փոքր և միջին բիզնեսին տրամադրած վարկերը: Փոքր և միջին բիզնեսը ներառում է այն իրավաբանական անձանց և անհատ ձեռնարկատերերին, որոնց աշխատակիցների թվաքանակը կազմում է մինչև հարյուր աշխատող:

3-րդ կետում լրացվում է 1-ին կետում լրացված վարկերի քանակը:

«II. Ներգրավված միջոցներ» բաժինը լրացվում է ըստ մարզերից ներգրաված միջոցների, ըստ ժամկետի (ցպահանջ կամ ժամկետային) և ըստ արժույթի տեսակի: Ֆիզիկական անձանցից ներգրաված միջոցների` ըստ հանրապետության մարզերի դասակարգումը կատարվում է ելնելով նրանց բնակության վայրից:

Իրավաբանական անձանցից ներգրաված միջոցների` ըստ հանրապետության մարզերի դասակարգումը կատարվում է ելնելով նրանց գտնվելու վայրից: Իրավաբանական անձանց կազմում չեն ընդգրկվում ֆինանսաբանկային ինստիտուտները:

Ֆիզիկական և իրավաբանական անձանցից ներգրաված ավանդների քանակը լրացվում է` ելնելով համապատասխան ավանդային հաշիվների քանակից: