ԱՐՁԱՆԱԳՐՈՒԹՅՈՒՆ ՀՀ ԿԱՌԱՎԱՐՈՒԹՅԱՆ ԵՎ ՌՈՒՍԱՍՏԱՆԻ ԴԱՇՆՈՒԹՅԱՆ ԿԱՌԱՎԱՐՈՒԹՅԱՆ ՄԻՋԵՎ՝ ՀՀ ԿԱՌԱՎԱՐՈՒԹՅԱՆ ԵՎ ՌՈՒՍԱՍՏԱՆԻ ԴԱՇՆՈՒԹՅԱՆ ԿԱՌԱՎԱՐՈՒԹՅԱՆ ՄԻՋԵՎ ԶԻՆՎՈՐԱԿԱՆ ՍՈՒՐՀԱՆԴԱԿԱՓՈՍՏԱՅԻՆ ԿԱՊԻ ՈԼՈՐՏՈՒՄ ՀԱՄԱԳՈՐԾԱԿՑՈՒԹՅԱՆ ՄԱՍԻՆ ՀԱՄԱՁԱՅՆԱԳՐՈՒՄ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ

Ա Ր Ձ Ա Ն Ա Գ Ր ՈՒ Թ Յ ՈՒ Ն

Հայաստանի Հանրապետության Կառավարությունը և Ռուսաստանի Դաշնության Կառավարությունը, այսուհետև՝ Կողմեր,

2013թ. դեկտեմբերի 2-ի՝ Հայաստանի Հանրապետության Կառավարության և Ռուսաստանի Դաշնության Կառավարության միջև զինվորական սուրհանդակափոստային կապի ոլորտում համագործակցության մասին համաձայնագրի (այսուհետև՝ Համաձայնագիր) 10-րդ հոդվածին համապատասխան,

նկատի ունենալով 2014թ. մայիսի 29-ի՝ Եվրասիական տնտեսական միության մասին պայմանագիրը և 2014թ. հոկտեմբերի 10-ի՝ Հայաստանի Հանրապետության` «Եվրասիական տնտեսական միության մասին» 2014 թվականի մայիսի 29-ի պայմանագրին միանալու մասին պայմանագիրը,

համաձայնեցին ներքոնշյալի մասին.

Հոդված 1

Համաձայնագրի 2-րդ հոդվածը լրացնել հետևյալ բովանդակությամբ պարբերությամբ.

«սուրհանդակներ (ցրիչներ և թղթատարներ) - Կողմի լիազոր մարմնի պաշտոնատար անձինք, ովքեր, այդ Կողմի պետության օրենսդրությանը համապատասխան, իրականացնում են զինվորական նամակագրության առաքման պարտականությունները:»:

Հոդված 2

Համաձայնագրի 3-րդ հոդվածը շարադրել հետևյալ խմբագրությամբ.

«Հոդված 3

Սույն Համաձայնագրի իրականացման համար Կողմերի պետությունների լիազոր մարմիններն են՝

Հայկական կողմից՝ Հայաստանի Հանրապետության պաշտպանության նախարարությունը,

Ռուսական կողմից՝ Ռուսաստանի Դաշնության պաշտպանության նախարարությունը:

Կողմերն իրենց լիազոր մարմինների փոփոխության մասին միմյանց ծանուցում են դիվանագիտական ուղիներով:»:

Հոդված 3

Համաձայնագրի 4-րդ հոդվածը լրացնել հետևյալ բովանդակությամբ պարբերությամբ.

«Կողմերի պետությունների լիազոր մարմինների փոխադարձ պայմանավորվածությամբ՝ մի Կողմի՝ մյուս Կողմի պետության զորամասերին և կազմակերպություններին հասցեագրված զինվորական նամակագրության առաքումը կարող է իրականացվել այդ մյուս Կողմի զինվորական սուրհանդակափոստային կապի ցանցի միջոցով՝ սեփական զինվորական նամակագրության առաքման համար սահմանված կանոններով:»:

Հոդված 4

Համաձայնագրի 5-րդ հոդվածի առաջին և երկրորդ պարբերությունները շարադրել հետևյալ խմբագրությամբ.

«Սույն Համաձայնագրին համապատասխան առաքվող զինվորական նամակագրությունն անձեռնմխելի է և չի կարող ո՛չ բացվել, ո՛չ պահվել:

Այն Կողմի պետության սահմանապահ մարմինները, որի տարածք առաքվում է զինվորական նամակագրությունը, ապահովում են սուրհանդակների (ցրիչների և թղթատարների)՝ պետական սահմանի անարգել հատումը սույն Համաձայնագրի 6-րդ հոդվածով նախատեսված փաստաթղթեր ներկայացնելու դեպքում, ինչպես նաև ցուցաբերում են աջակցություն զինվորական նամակագրության օպերատիվ առաքման կազմակերպմանը և անհրաժեշտ օգնություն նրանց կողմից իրենց իրավասության շրջանակներում իրենց ծառայողական պարտականությունները կատարելիս:»:

Հոդված 5

Համաձայնագրի 6-րդ հոդվածի երկրորդ և վեցերորդ պարբերություններն ուժը կորցրած ճանաչել:

Հոդված 6

1. Համաձայնագրի հավելվածի 8-րդ կետը շարադրել հետևյալ խմբագրությամբ.

«8. Չի թույլատրվում այնպիսի զինվորական նամակագրության առաքումը, որի պարունակությունն այն Կողմի պետության օրենսդրության համաձայն, որտեղ իրականացվում է առաքումը, դասվում է արգելված վտանգավոր բեռների և իրերի (այդ թվում՝ զենքի, թմրանյութի և դրանց կիրառման ու պատրաստման հարմարանքների) շարքին»:

2. Համաձայնագրի հավելվածի 9-րդ կետում հանել «, ինչպես նաև լիազոր մարմինների կողմից տրված հաշվեցուցակային զենքի վերաբերյալ տվյալներ՝ Հայաստանի Հանրապետության Կառավարության և Ռուսաստանի Դաշնության Կառավարության միջև զինվորական սուրհանդակափոստային կապի ոլորտում համագործակցության մասին Համաձայնագրի 6-րդ հոդվածի համաձայն» բառերը:

Հոդված 7

Սույն Արձանագրությունն ուժի մեջ է մտնում Համաձայնագրի 10-րդ հոդվածով նախատեսված կարգով:

Կատարված է Մոսկվա քաղաքում 2018թ. դեկտեմբերի 27-ին, երկու բնօրինակով, յուրաքանչյուրը՝ հայերեն և ռուսերեն, ընդ որում՝ երկու տեքստերն էլ հավասարազոր են: