ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
Ո Ր Ո Շ ՈՒ Մ
5 հուլիսի 1993 թ. N 344
Քաղ. Երևան
ՀԱՍԱՐԱԿԱԿԱՆ ՍՆՆԴԻ, ԱՌԵՎՏՐԱԳՆՄԱՆ ԵՎ ԿՈՄԻՍԻՈՆ ԱՌԵՎՏՐԻ ԲՆԱԳԱՎԱՌՆԵՐՈՒՄ ԳՈՐԾՈՂ ՈՉ ՊԵՏԱԿԱՆ ՁԵՌՆԱՐԿՈՒԹՅՈՒՆՆԵՐԻ ՊԵՏԱԿԱՆ ՍՈՑԻԱԼԱԿԱՆ ԱՊԱՀՈՎԱԳՐՈՒԹՅԱՆ ՄՈՒԾՈՒՄՆԵՐԻ ԴՐՈՒՅՔԱՉԱՓԵՐԻ ԵՎ ՎՃԱՐՄԱՆ ԿԱՐԳԻ ՄԱՍԻՆ
Ի կատարումն Հայաստանի Հանրապետության նախագահի 1993 թվականի հունվարի 25-ի «Պետական սոցիալական ապահովագրության մուծումների դրույքաչափերի մասին» հրամանագրի 5-րդ կետի «բ» ենթակետի, Հայաստանի Հանրապետության կառավարությունը որոշում է.
1. Հասարակական սննդի, առևտրագնման և կոմիսիոն առևտրի բնագավառներում գործող ոչ պետական ձեռնարկությունների աշխատողների պետական սոցիալական ապահովագրության մուծումների դրույքաչափերը 1993 թվականին սահմանել` աշխատանքի վարձատրությանն ուղղված միջոցների ընդհանուր գումարի նկատմամբ 37 տոկոսի չափով և յուրաքանչյուր աշխատողի աշխատավարձից (վաստակից)` 1 տոկոսի չափով:
2. Սահմանել, որ սույն որոշման 1-ին կետում նշված ձեռնարկություններն աշխատանքի վարձատրությանն ուղղված միջոցների ընդհանուր գումարի 2 տոկոսը փոխանցում են Հայաստանի Հանրապետության սոցիալական ապահովագրության ֆոնդին, իսկ նշված գումարի 35 տոկոսը և յուրաքանչյուր աշխատողի աշխատավարձի (վաստակի) 1 տոկոսը` Հայաստանի Հանրապետության կենսաթոշակային և զբաղվածության ֆոնդին:
Պետական սոցիալական ապահովագրության մուծումները կատարվում են յուրաքանչյուր ամիսը մեկ անգամ, սակայն ոչ ուշ, քան մինչև հաշվետու ամսվան հաջորդող ամսվա 15-ը:
3. Սույն որոշման 1-ին կետում նշված ձեռնարկությունները պարտավոր են գրանցվել Հայաստանի Հանրապետության կենսաթոշակային և զբաղվածության ֆոնդում` որպես ապահովադիրներ և սահմանված կարգով ու ժամկետում կետում կատարել պետական սոցիալական ապահովագրական մուծումները:
4. Հայաստանի Հանրապետության կենսաթոշակային և զբաղվածության ֆոնդին`
ա) պատգամավորների տեղական խորհուրդների գործկոմների հետ համատեղ ապահովել սույն որոշման կատարումը.
բ) երկամսյա ժամկետում Հայաստանի Հանրապետության կառավարություն ներկայացնել առաջարկություն գործող օրենսդրության մեջ սույն որոշումից բխող փոփոխություններ և լրացումներ կատարելու վերաբերյալ:
|
Հայաստանի Հանրապետության վարչապետ |
Հ. ԲԱԳՐԱՏյան |
|
Հայաստանի Հանրապետության ԿԱՌԱՎԱՐՈՒԹՅԱՆ ԳՈՐԾԵՐԻ ԿԱՌԱՎԱՐիչ |
Ա. ԽԱՉԱՏՐՅԱՆ |