ՀՀ ԿՐԹՈՒԹՅԱՆ, ԳԻՏՈՒԹՅԱՆ, ՄՇԱԿՈՒՅԹԻ ԵՎ ՍՊՈՐՏԻ ՆԱԽԱՐԱՐԻ ՀՐԱՄԱՆԸ ՀՀ ԿՐԹՈՒԹՅԱՆ, ԳԻՏՈՒԹՅԱՆ, ՄՇԱԿՈՒՅԹԻ ԵՎ ՍՊՈՐՏԻ ՆԱԽԱՐԱՐՈՒԹՅԱՆ ԿՈՂՄԻՑ ՄԱՐԶԵՐԻ ՊԵՏԱԿԱՆ ՈՒՍՈՒՄՆԱԿԱՆ ՀԱՍՏԱՏՈՒԹՅՈՒՆՆԵՐ ՀԱՄԱՊԱՏԱՍԽԱՆ ՄԱՍՆԱԳԵՏ ԳՈՐԾՈՒՂԵԼՈՒ ԿԱՐԳԸ ՍԱՀՄԱՆԵԼՈՒ ՄԱՍԻՆ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԿՐԹՈՒԹՅԱՆ, ԳԻՏՈՒԹՅԱՆ, ՄՇԱԿՈՒՅԹԻ ԵՎ ՍՊՈՐՏԻ ՆԱԽԱՐԱՐ

14 հոկտեմբերի 2020 թ.

N 40-Ն

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿՐԹՈՒԹՅԱՆ, ԳԻՏՈՒԹՅԱՆ, ՄՇԱԿՈՒՅԹԻ ԵՎ ՍՊՈՐՏԻ ՆԱԽԱՐԱՐՈՒԹՅԱՆ ԿՈՂՄԻՑ ՄԱՐԶԵՐԻ ՊԵՏԱԿԱՆ ՈՒՍՈՒՄՆԱԿԱՆ ՀԱՍՏԱՏՈՒԹՅՈՒՆՆԵՐ ՀԱՄԱՊԱՏԱՍԽԱՆ ՄԱՍՆԱԳԵՏ ԳՈՐԾՈՒՂԵԼՈՒ ԿԱՐԳԸ ՍԱՀՄԱՆԵԼՈՒ ՄԱՍԻՆ

(վերնագիրը փոփ. 16.11.23 N 140-Ն)

Հիմք ընդունելով «Հանրակրթության մասին» Հայաստանի Հանրապետության օրենքի 30-րդ հոդվածի 1-ին մասի 26.11-րդ կետով ամրագրված դրույթները.

ՀՐԱՄԱՅՈՒՄ ԵՄ

1. Սահմանել Հայաստանի Հանրապետության կրթության, գիտության, մշակույթի և սպորտի նախարարության կողմից մարզերի պետական ուսումնական հաստատություններ համապատասխան մասնագետ գործուղելու կարգը՝ համաձայն հավելվածի։

(1-ին կետը փոփ. 16.11.23 N 140-Ն)

2. Սահմանել, որ.

ա․ մինչև սույն հրամանի ուժի մեջ մտնելը Հայաստանի Հանրապետության կառավարության 2003 թվականի սեպտեմբերի 25-ի թիվ 1412-Ն որոշմամբ պետական ուսումնական հաստատություններ գործուղված մասնագետների հետ կնքված պայմանագրերը պահպանում են իրենց ուժը մինչև 2020-2021թ․ ուսումնական տարվա ավարտը, եթե դրանցով ավելի կարճ ժամկետներ նախատեսված չեն։

բ․ սույն հրամանով սահմանված կարգով ամրագրված դրույթների կիրառման սկիզբ է համարվում 2021 թվականի հունվարի 1-ը։

3. Հայաստանի Հանրապետության կրթության, գիտության, մշակույթի և սպորտի նախարարության անձնակազմի կառավարման վարչությանը՝ մինչև 2021 թվականի հունվարի 1-ը ապահովել սույն հրամանով հաստատված կարգի 2-րդ կետով նախատեսված Հայաստանի Հանրապետության կրթության, գիտության, մշակույթի և սպորտի նախարարության կողմից մարզերի պետական ուսումնական հաստատություններ համապատասխան մասնագետ գործուղելու նպատակով գործուղվող մասնագետների թեկնածուների շտեմարանի ստեղծումը, իսկ սույն հրամանով հաստատված կարգի 6-րդ կետով նախատեսված հայտերի ընդունումը կազմակերպել 2021 թվականի հունվարի 1-ից:

(3-րդ կետը փոփ. 16.11.23 N 140-Ն)

4. Սույն հրամանն ուժի մեջ է մտնում պաշտոնական հրապարակմանը հաջորդող օրվանից։

Նախարար

Ա. Հարությունյան

Հավելված ՀՀ կրթության, գիտության, մշակույթի և սպորտի նախարարի 2020 թվականի հոկտեմբերի 14-ի N 40-Ն հրամանի»

ԿԱՐԳ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿՐԹՈՒԹՅԱՆ, ԳԻՏՈՒԹՅԱՆ, ՄՇԱԿՈՒՅԹԻ ԵՎ ՍՊՈՐՏԻ ՆԱԽԱՐԱՐՈՒԹՅԱՆ ԿՈՂՄԻՑ մարզերի ՊԵՏԱԿԱՆ ՈՒՍՈՒՄՆԱԿԱՆ ՀԱՍՏԱՏՈՒԹՅՈՒՆՆԵՐ ՀԱՄԱՊԱՏԱՍԽԱՆ ՄԱՍՆԱԳԵՏ ԳՈՐԾՈՒՂԵԼՈՒ

(վերնագիրը փոփ. 16.11.23 N 140-Ն)

1. Սույնով կարգով կարգավորվում են Հայաստանի Հանրապետության կրթության, գիտության, մշակույթի և սպորտի նախարարության (այսուհետ՝ նախարարություն) կողմից մարզերի պետական հանրակրթական ուսումնական հաստատություններ (այսուհետ՝ հաստատություններ) համապատասխան մասնագետ գործուղելու նպատակով գործուղվող մասնագետների (այսուհետ՝ գործուղվող մասնագետներ) ընտրության և գործուղելու ընթացակարգը, գործուղված մասնագետներին լրացուցիչ հատկացումների տրամադրման և օրենսդրությամբ նախատեսված հաշվետվությունների (այսուհետ՝ հաշվետվություն) ներկայացման գործընթացների հետ կապված հարաբերությունները։

2. Նախարարությունը գործուղվող մասնագետների թեկնածուների տվյալները հավաքագրելու նպատակով ստեղծում է շտեմարան, որը համապատասխան տվյալներով համալրելու նպատակով Կրթության կառավարման տեղեկատվական համակարգում ձևավորված հարթակում (https://kadrer.emis.am, այսուհետ՝ հարթակ) հրապարակում է համապատասխան հայտարարություն։ Գործուղվող մասնագետների թեկնածուների տվյալներով շտեմարանը համալրելու նպատակով նախարարություն կարող են դիմել ոչ միայն համապատասխան մասնագետներ, այլև պետական ոչ առևտրային և այլ կազմակերպություններ, հիմնադրամներ (այսուհետ` իրավաբանական անձ):

3. Իրավաբանական անձանց առաջարկությամբ շտեմարանում համալրված գործուղվող մասնագետների թեկնածուների տվյալներում պարտադիր նշվում է տվյալ մասնագետին առաջադրած իրավաբանական անձի անվանումը:

4. Գործուղվող մանկավարժական կադրերի պահանջարկը ձևավորվում է հարթակի «Գործուղման հայտարարություններ» բաժնում, եթե մինչ այդ առնվազն 1 անգամ հայտարարված մրցույթի արդյունքներով ուսուցչի թափուր տեղը չի համալրվել: Գործուղվող մասնագետների թեկնածուների շտեմարանը վարում է նախարարությունը։

5. Գործուղվող մասնագետների թեկնածուների շտեմարանում ընդգրկվում են տվյալներ Հայաստանի Հանրապետության օրենսդրությամբ մանկավարժական աշխատողի պաշտոն զբաղեցնելու իրավասություն ունեցող անձանց մասին։

6. Գործուղվող մասնագետների թեկնածուների շտեմարանում գրանցվելու նպատակով սույն կարգի 2-րդ կետում նշված հայտարարությանը համապատասխան դիմումատուները հարթակում ներկայացնում են դիմում /Ձև 1/՝ դրան կցելով՝

ա․ բարձրագույն կրթության դիպլոմի բնօրինակի տեսաներածված տարբերակը,

բ․ անձնագրի կամ նույնականացման քարտի բնօրինակի տեսաներածված տարբերակը,

գ․ ինքնակենսագրություն,

դ․ բնութագիր նախկին աշխատավայրից (առկայության դեպքում),

ե․մասնագիտական գիտելիքների և աշխատանքային ունակությունների տիրապետման տեսանկյունից ներկայացվող պահանջների բավարարումը հավաստող այլ փաստաթղթեր (դիմումատուի ցանկությամբ),

զ. գրավոր համաձայնություն` գործուղման վայրում առավելագույնը երկու ուսումնական տարի բնակվելու մասին,

է․տեղեկանք բնակության վայրի վերաբերյալ կամ անձնագրի՝ բնակության վայրի տեսաներածված տարբերակը։

7. Գործուղվող թեկնածուի հայտը հաստատվելուց հետո նախարարությունը 2 աշխատանքային օրվա ընթացքում թեկնածուին է ներկայացնում առաջարկություն տվյալ հաստատություն գործուղվելու վերաբերյալ, և թեկնածուի համաձայնության դեպքում տրամադրում է գործուղման ուղեգիր։ Եթե թեկնածուն երեք անգամ հրաժարվում է հաստատություն գործուղվելու վերաբերյալ առաջարկությունից, նրա տվյալները հանվում են գործուղվող թեկնածուների շտեմարանից երեք տարով։

8. Գործուղվող թեկնածուն սույն կարգի 7-րդ կետում նշված ուղեգիրը ստանալուց հետո հաստատության հետ կնքում է առավելագույնը երկու ուսումնական տարվա համար աշխատանքային պայմանագիր։

9. Հաստատությունը սույն կարգի 8-րդ կետով համապատասխան պայմանագրի կնքելուց հետո պայմանագրի և ուղեգրի պատճենները տրամադրում է լիազոր մարմնին, որն առկա տեղեկատվությունն ամփոփելուց հետո դրանք արտացոլում է սույն կարգի 12-րդ կետով նշված հաշվետվությունում։

10. Սույն կարգին համապատասխան գործուղված մասնագետներին Հայաստանի Հանրապետության պետական բյուջեով նախատեսված միջոցների հաշվին (իրավաբանական անձանց առաջարկությամբ շտեմարանում համալրված և գործուղված մասնագետներին` տվյալ իրավաբանական անձի միջոցների հաշվին կամ հաստատության կողմից սույն կետի զ. ենթակետով սահմանված լրավճարի տրամադրմամբ) տվյալ ուսումնական հաստատությունը լրացուցիչ հատկացնում է.

ա․ իր և իր ընտանիքի անդամների տեղափոխման տրանսպորտային ծախսերը` միայն միկրոավտոբուսային երթուղի լինելու դեպքում` միկրոավտոբուսային երթուղիների համար սահմանված սակագնի չափով, իսկ միկրոավտոբուսային և ավտոբուսային երթուղիներ լինելու դեպքում` ավտոբուսային երթուղիների համար սահմանված սակագնի չափով, ընդ որում, տվյալ բնակավայր(եր)ի համար երթուղու բացակայության դեպքում հիմք է ընդունվում վերջին(ներ)իս ամենամոտ բնակավայր(եր)ի համար սահմանված սակագինը,

բ․ իր և իր ընտանիքի անդամների անհրաժեշտ գույքի տեղափոխման տրանսպորտային ծախսերը` մինչև 50 կիլոմետր ճանապարհի համար` 10000 դրամ, 50 կիլոմետրից ավելի յուրաքանչյուր մինչև 50 կիլոմետրի համար` 8000 դրամ, բայց ոչ ավելի, քան 50000 դրամը,

գ․ տարեկան 4 անգամ մշտական բնակավայր այցելելու համար տրանսպորտային ծախս՝ միկրոավտոբուսային երթուղի լինելու դեպքում` միկրոավտոբուսային երթուղիների համար սահմանված սակագնի չափով, իսկ միկրոավտոբուսային և ավտոբուսային երթուղիներ լինելու դեպքում` ավտոբուսային երթուղիների համար սահմանված սակագնի չափով, ընդ որում, տվյալ բնակավայր(եր)ի համար երթուղու բացակայության դեպքում հիմք է ընդունվում վերջին(ներ)իս ամենամոտ բնակավայր(եր)ի համար սահմանված սակագինը,

դ․ բնակարանային վարձի համար՝ ըստ մարզերի հետևյալ սահմանաչափով․

հ/հ	մարզը	վարձավճարի մեծությունը՝ ՀՀ դրամ
		քաղաք	գյուղական համայնք
1	Արագածոտն	23000	16000
2	Արարատ	27000	19000
3	Արմավիր	32000	22000
4	Գեղարքունիք	15000	11000
5	Լոռի	13000	10000
6	Կոտայք	34000	24000
7	Շիրակ	21000	15000
8	Սյունիք	33000	23000
9	Վայոց Ձոր	30000	21000
10	Տավուշ	26000	18000

ե․ կոմունալ ծախսերի համար՝ ամսական 10200 դրամ,

զ․ աշխատավարձի նկատմամբ հաշվարկվող լրավճար` աշխատավարձի 30 տոկոսի չափով։

11․ Սույն կարգի 10-րդ կետում նշված հատկացումները տրամադրվում են լիազոր մարմնի կողմից՝ եռամսյակային կտրվածքով։

12. Մարզպետների աշխատակազմերը մինչև 2026 թվականի սեպտեմբերի 1-ը եռամսյակային և տարեկան կտրվածքով նախարարություն են ներկայացնում հաշվետվությունը՝ կից նաև տեղեկատվություն Ձև 2-ին համապատասխան։ 2026 թվականի սեպտեմբերի 1-ից հետո նախարարությունն է եռամսյակային և տարեկան կտրվածքով հավաքագրում հաշվետվությունը՝ կից նաև տեղեկատվություն Ձև 2-ին համապատասխան։

13. Սույն կարգին համապատասխան գործուղված մասնագետները կարող են միաժամանակ օգտվել նաև հանրակրթական դպրոցների մանկավարժներին և դպրոցահասակ երեխաներին տրանսպորտային ծառայությունների դիմաց փոխհատուցման կարգից՝ օրենսդրությամբ սահմանված կարգով Հայաստանի Հանրապետության մարզերում տեղակայված հանրակրթական այլ դպրոցներում աշխատանքային պայմանագրեր կնքելու դեպքում, իսկ իրավաբանական անձանց առաջարկությամբ շտեմարանում համալրված և գործուղված մասնագետներին տրանսպորտային ծառայությունների դիմաց փոխհատուցում են տվյալ իրավաբանական անձինք։

Ձև 1

ԴԻՄՈՒՄ

Հաստատություններ համապատասխան մասնագետ գործուղելու նպատակով գործուղվող թեկնածուների տվյալների բազայում գրանցվելու

Հայաստանի Հանրապետության

կրթության, գիտության, մշակույթի և սպորտի նախարար

 ________________________________________-ին

_______________________________________________- ից

 դիմողի անունը, հայրանունը, ազգանունը

__________________________________________________

 Դիմողի բնակության վայրը

________________________________________________

 դիմողի հեռ. (աշխատանքային, բնակ., բջջ.)

 ________________________________________________

 ՀԾՀ-ն (հանրային ծառայության համարանիշը)

ԴԻՄՈՒՄ

 Ծանոթանալով Հայաստանի Հանրապետության կրթության, գիտության, մշակույթի և սպորտի նախարարի կողմից սահմանված Հայաստանի Հանրապետության կրթության, գիտության, մշակույթի և սպորտի նախարարության կողմից մարզերի պետական ուսումնական հաստատություններ համապատասխան մասնագետ գործուղելու կարգին՝ խնդրում եմ ինձ գործուղել ՀՀ ------------------------------------------------- մարզ/եր/ի հանրակրթական դպրոցներ, որպես --------------------------------------------- առարկայի ուսուցիչ:

Կից ներկայացնում եմ․

● բարձրագույն կրթության դիպլոմի բնօրինակի տեսաներածված տարբերակը*,

● «Հանրակրթության մասին» ՀՀ օրենքի 12-րդ հոդվածի 2-րդ կետին համապատասխան աշխատանքային ստաժի վերաբերյալ անհատական հաշվից քաղվածքի բնօրինակի տեսաներածված տարբերակը*,

● անհրաժեշտության դեպքում՝ աշխատանքային գրքույկի բնօրինակի տեսաներածված տարբերակը),

● անձնագրի կամ նույնականացման քարտի բնօրինակի տեսաներածված տարբերակը*,

● ինքնակենսագրություն*,

● բնութագիր նախկին աշխատավայրից,

● գրավոր համաձայնություն` գործուղման վայրում առավելագույնը երկու ուսումնական տարի բնակվելու մասին*,

● տեղեկանք բնակության վայրի վերաբերյալ կամ անձնագրի՝ բնակության վայրի տեսաներածված տարբերակը*,

● մասնագիտական գիտելիքների և աշխատանքային ունակությունների տիրապետման տեսանկյունից ներկայացվող պահանջների բավարարումը հավաստող այլ փաստաթղթեր, մասնավորապես․

----------------------------------------------------------------------------------------------------------

----------------------------------------------------------------------------------------------------------

*-ով նշված փաստաթղթերի ներկայացումը պարտադիր է։

Դիմող` ___________________

ստորագրություն

 «_____» ____________ 2026 թ.

Ձև 2

ՏԵՂԵԿԱՏՎՈՒԹՅՈՒՆ

(հավելվածը լրաց., փոփ., խմբ. 09.07.21 N 48-Ն, փոփ. 16.11.23 N 140-Ն, խմբ. 24.06.24 N 51-Ն, փոփ. 17.10.25 N 75-Ն, խմբ. 21.05.26 N 19-Ն)

Պաշտոնական հրապարակման օրը՝ 5 նոյեմբերի 2020 թվական: